लयमा फर्कियो सिटी, वेष्टह्याम्प विरुद्ध सानदार जित

काठमाडौं । इंग्लिस प्रिमियर लिग (इपीएल)मा डिफेन्डिङ च्याम्पियन म्यानचेस्टर सिटीले आफूलाई अब लयमा फर्किएको संकेत गरेको छ ।

सन् २०२४ मा खराब प्रदर्शन गरेको सिटीले २०२५ को पहिलो प्रिमियर लिग खेलमा वेष्टह्याम्पलाई ४-१ ले पराजित गर्न सफल बन्यो । यही खेलबाट पछिल्लो समय लय गुमाएका सिटीका स्टार खेलाडी हाल्याण्ड पनि लयमा देखिए ।

सिटीको लागि शनिवारको खेलमा पहिलो गोल उपहारस्वरूप प्राप्त भयो । वेष्टह्यामका भ्लादिमिर कोफलले आत्मघाती गोल गरेपछि सिटीले १० मिनेटमा नै सुरुवाती अग्रता लिएको थियो । त्यसपछि लगातार हाल्याण्डले ४२ र ५५ औँ मिनेटमा गोल गर्दै अग्रता ३-० को बनाए । हाल्याण्डको दोस्रो गोलको तेस्रो मिनेटमा नै सिटीका फिल फोडेनले गोल गरेपछि सिटी ४-० ले अघि रह्यो ।

खेलमा वेष्टह्याम्पको लागि एक मात्र सान्त्वना गोल निकलस फूलक्रगले ७१ औ मिनेटमा गरे ।

आजको जितपछि पनि सिटी तालिकाको उहीँ स्थानमा छ । अर्थात् २० खेलबाट ३४ अङ्क सहित सिटी तालिकाको छैटौँ स्थानमा छ भने पराजित वेष्टह्याम्प २३ अङ्क सहित १३ औँ स्थानमा छ ।