विद्यार्थीहरूलाई ४५ दिनको भलिबल प्रशिक्षण

सिन्धुपाल्चोक । भलिबल खेलप्रति विद्यार्थीहरूलाई उत्साह जगाउने उद्देश्यले सिन्धुपाल्चोकको लिसंखु पाखर गाउँपालिका-७ का ३८ विद्यार्थीहरूलाई भलिबल प्रशिक्षण दिइएको छ ।

लिसंखु पाखर-७ मा रहेको ककलिङ हरिसिद्धि मावि र संसारी माई माविमा अध्ययनरत ३८ जना विद्यार्थीहरूलाई ४५ दिनसम्म तालिम दिइएको थियो ।

४५ दिनसम्म सञ्चालन भएको संयुक्त भलिबल प्रशिक्षणमा दुवै विद्यालयका विद्यार्थीहरूले भलिबल खेलका नियम र उत्कृष्ट भलिबल कसरी खेल्न सकिन्छ भनेर विद्यार्थीहरूलाई तालिम प्रदान गरिएको मुख्य प्रशिक्षक विकास गुरुङले जानकारी दिए ।

युएसए निवासी अभिषेक घिसिङको छैटौं जन्म दिवसको अवसर पारेर उनका बुवा चक्रवती घिसिङले भलिबल प्रशिक्षणको सबै खर्च व्यहोरेका थिए ।

आफूहरू देश बाहिर भए पनि आफ्नो जन्मथलोमा केही सामाजिक कामहरू गर्नुपर्छ भनेर विद्यार्थीहरूलाई भलिबल प्रशिक्षण दिइएको घिसिङले बताइन । घिसिङ ककलिङ हरिसिद्धि माविकी पूर्वविद्यार्थी समेत हुन ।

४५ दिनसम्म सञ्चालन भएको संयुक्त भलिबल प्रशिक्षण कार्यक्रमको समापनमा प्रशिक्षकहरू विकास गुरुङ, शेरबहादुर मगर, अर्जुन खतिवडा र फिलेमोन तामाङलाई सम्मान गरिएको थियो ।

त्यस्तै भलिबल प्रशिक्षणमा उत्कृष्ट हुने विद्यार्थी,अन्य सहयोगीहरूलाई समेत सम्मान गरिएको भलिबल प्रशिक्षणकी संयोजक समेत रहेकी युवा संघका नेतृ रेखा तामाङ लोप्चनले जानकारी दिइन ।

ककलिङ हरिसिद्धि माविको पूर्वप्रधानाध्यापक कमल श्रेष्ठले प्रशिक्षक, विद्यार्थी र सहयोगीहरूलाई सम्मान गरेका थिए ।