केन्द्रीय कमिटीमा यथास्थितिबाट सिफ्ट गर्दै विचार अघि बढाउनेबारे छलफल हुनेछ : सापकोटा

काठमाडौं । नेकपा माओवादी केन्द्रले केन्द्रीय कमिटी बैठकलाई व्यवस्थित, प्रभावकारी र उपलब्धिमूलक बनाउने निर्णय गरेको छ । माओवादी केन्द्रको केन्द्रीय समिति बैठक आज १ बजेदेखि धुम्बाराहीमा बस्दैछ ।

केन्द्रीय कमिटी बैठक बस्नुअघिको स्थायी कमिटी बैठकमा पार्टीमा संगठनात्मक सिद्धान्त कसरी अघि बढाउनेबारे ठोस निर्णय निकाल्नेबारे छलफल भएको प्रवक्ता अग्नि सापकोटाले बताए ।

‘आधारभूत रूपमा त मालेमावादी संगठनात्मक सिद्धान्तलाई नै अघि बढाउँछौं । युवाहरूलाई प्रशिक्षित गर्ने र संगठित गर्दै विज्ञान प्रविधिसँग जोडेर नयाँ सिद्धान्तको विचारको विकास गर्नुपर्छ भनेर स्थायी कमिटी सदस्यहरूले सुझाव दिनुभएको छ । परिमार्जन नयाँ राजनीतिक कार्यदिशासहित यथास्थितिबाट सिफ्ट गर्ने गरी बैठकमा छलफल हुनेछ’, सापकोटाले भने ।

अध्यक्ष पुष्पकमल दाहाल ‘प्रचण्ड’ ले बैठक उद्घाटनसँगै समसामयिक राजनीति परिवेशबारे ब्रिफिङ गर्ने, प्रदेश अध्यक्षहरूले रिपोर्टिङ गर्ने, त्यसपछि अध्यक्षबाट राजनीतिक प्रतिवेदन पेस गर्ने साथै संगठनात्मक सिद्धान्तबारे छलफल हुने उनको भनाइ छ ।