अग्नि सापकोटाको भनाइमा जनार्दनको आपत्ति, फरक मत केन्द्रीय कमिटीमा लैजाने तयारी

काठमाडौं । नेकपा माओवादी केन्द्रका उपमहासचिव जनार्दन शर्माले उपाध्यक्ष तथा प्रवक्ता अग्नि सापकोटाले स्थायी कमिटीको निर्णय भनेर दिएको वक्तव्यप्रति आपत्ति जनाएका छन् ।

शर्माले सापकोटाको नाम नलिई कतिपय सञ्चार माध्यममा स्थायी कमिटीको निर्णय भनी आएको कुरामा आफ्नो ध्यानाकर्षण भएको जनाएका छन् ।

आजदेखि बस्ने केन्द्रीय कमिटी बैठकका एजेण्डा तय गर्न शनिबार बसेको स्थायी कमिटी बैठकले अहिले विवाद र फरक मतका विषय बैठकमा नलगी अभियानमा एकताबद्ध भएर तलसम्म जाने निर्णय भएको सापकोटाले बताएका थिए ।

तर, शर्माले आइतबार सामाजिक संजालमार्फत सापकोटाको सो भनाइको खण्डन गरेका हुन् । गत स्थायी कमिटी बैठकमा कार्यविभाजन लगायत अध्यक्ष प्रचण्डको कार्यशैलीविरुद्ध लिखितरूपमा फरक मत राखेका शर्मा यसपटक पनि आफ्नो मत केन्द्रीय कमिटीमा छलफलका लागि लैजाने तयारीमा छन् ।

तर, शनिबारको स्थायी कमिटी बैठकले फरक मत र विवादका विषयमा यसपटक छलफल नगर्ने निर्णय भएको सापकोटाले बताएका थिए । पार्टी एकताबद्ध भएर अभियानमा केन्द्रित हुनुपर्ने भएकाले अब विवादका विषय महाधिवेशनमा छलफल हुने उनको भनाइ थियो ।

सापकोटाको भनाइको खण्डन गर्दै शर्माले भनेका छन्–

स्थायी कमिटी बैठकमा केन्द्रीय कमिटीका लागि एजेन्डा प्रस्तुत गरिएको, स्थायी कमिटी सदस्यले आफ्ना सुझाव प्रस्तुत गरेको र केन्द्रीय कमिटीमा छलफल बहसपश्चात निष्कर्षमा पुग्ने अध्यक्षले उद्घोष गर्नु भएको बाहेक कुनै निर्णय नभएकोमा, कतिपय सञ्चारमाध्यममा स्थायी कमिटीको निर्णय भनी आएकोमा मेरो ध्यानाकर्षण भएको छ ।

शर्माले अघिल्लो बैठकमा फरक मत राखेपछि पार्टीमा विभिन्न आशंका उत्पन्न भएका थिए । अध्यक्ष प्रचण्डको सचिवालयबाटै जनार्दन शर्माले पार्टी फुटाउँदैछ भन्ने हल्ला फैलाएको आरोप उनले लगाएका थिए । प्रचण्डले पनि आफूलाई त्यस्तो सूचना आएको बताएका थिए ।