दोस्रो ई-स्पोर्ट्स राष्ट्रिय च्याम्पियनसिप फागुनमा हुने, पुरस्कार २५ लाख

काठमाडौं । ई–स्पोर्ट्स संघ नेपाल (इशान) को वार्षिक क्यालेन्डर अनुसार दोस्रो ई स्पोर्ट्स राष्ट्रिय च्याम्पियनसिप फागुनको दोस्रो सातामा आयोजना हुने भएको छ ।

प्रतियोगिता फागुनको ८, ९ र १० गते काठमाडौंमा आयोजना हुने भएको हो । प्रतियोगितामा ई–फुटबल, मोबाईल लिजेन्ड्स, पब्जी मोबाईल, डोटा टू, भ्यालोरेन्ट, कस प्ले गरी ६ वटा प्रतियोगिता हुने छ ।

मुख्य पुरस्कार २५ लाख रुपैयाँ रहेको छ । नेपालको ई–स्पोर्ट्स क्षेत्रमा पहिलो पटक सबैभन्दा ठुलो पुरस्कार राशीको साथ प्रतियोगिता आयोजना हुने भएको हो ।

छनोट चरणका खेलहरू अनलाइनबाट हुने छन् । भने, फाइनल खेलको मुख्य इभेन्ट काठमाडौंमा सम्पन्न गरिनेछ ।

इशानले यस प्रतियोगिताको म्यानेजमेन्ट र मार्केटिङको अधिकार सप्लाई अनलिमिटेडलाई तीन वर्षका लागि प्रदान गरेको छ ।

सम्झौता अनुसार प्रतियोगिताको सम्पूर्ण व्यवस्थापन र बजारीकरण सप्लाई अनलिमिटेडले गर्ने छ । यस प्रतियोगिताको ब्राण्ड एम्बास्डरको रूपमा चलचित्रकर्मी तथा ई–गेमिङका प्रवर्द्धक निश्चल बस्नेतलाई नियुक्त गरिएको छ ।

ई–स्पोर्ट्स संघ नेपालले स्थापनाको तेस्रो महिनामै सुर्खेतमा पहिलो राष्ट्रिय ई–स्पोर्ट्स च्याम्पियनसिपको आयोजना गरेको थियो ।