‘पूर्ण बहादुरको सारङ्गी’ का निर्देशक सरोज पौडेलले घोषणा गरे नयाँ चलचित्र

काठमाडौं । चलचित्र ‘पूर्ण बहादुरको सारङ्गी’ का निर्देशक सरोज पौडेलले नयाँ चलचित्रको निर्माण घोषणा गरेका छन् । आफूले निर्देशन गरेको चलचित्र ‘पूर्ण बहादुरको सारङ्गी’ ब्लकबस्टर भएपछि निर्देशक पौडेलले ‘कोसेढुंगा’ निर्माणको घोषणा गरेका हुन् ।

सरोज पौडेलले आफूले निर्देशन गर्ने चलचित्रको थिम पोस्टर सार्वजनिक गर्दै निर्माणको घोषणा गरेका छन् । थिम पोस्टरमा घुरमैलो बिहानीलाई पृष्ठभूमिमा राखेर पहाडलाई हेरिरहेकी एक महिला उभिएकी छिन् । माथि डाँडामा उभिएकी उनको अगाडि अग्लो रुख र पहाडी शैलीको घर छ ।

निर्माण पक्षका अनुसार चलचित्र २०८२ मा रिलिज हुनेछ । नरदेवी फिल्मसको प्रस्तुति रहेको चलचित्रमा प्रेविल कँडेल र हरि महतको लगानी रहने छ भने दिनेश खड्का कार्यकारी निर्माता रहेका छन् ।

बाबु श्रेष्ठको डीओपी रहने चलचित्र सुरेन्द्र पौडेलले सम्पादन गर्नेछन् । चलचित्रमा संगीत रिदम कँडेल र आषिश अविरलको रहनेछ । कास्टिङ डिरेक्टर सुवलमणि सापकोटा रहनेछन् । चलचित्रको मुख्य भूमिकामा को-को रहनेछन् त्यो भने निर्माण टिमले जानकारी दिएको छैन ।