लक्ष्मी सनराइज बैंकको अगुवाइमा बैंकहरु र अप्पर मर्स्याङ्दी हाइड्रोपावरबीच लगानी सम्झौता

काठमाडौं । लक्ष्मी सनराइज बैंक लिमिटेडको अगुवाइमा सह-वित्तीयकरणमा सहभागी बैंकहरु र अप्पर मर्स्याङ्दी हाइड्रोपावर कम्पनी प्रालिबीच सो कम्पनीले लमजुङ जिल्लास्थित मर्स्याङ्दी नदीमा निमार्ण गर्ने १०२ मेगावाट क्षमताको अप्पर मर्स्याङ्दी- १ जलविद्युत आयोजनामा लगानी गर्ने सम्झौता भएको छ ।

सो आयोजनाको कुल लागत २१.४० अर्ब रुपैयाँ रहेको छ । यो सहकार्यले नेपालको नवीकरणीय ऊर्जा परिदृश्यमा महत्वपूर्ण भूमिका खेल्ने विश्वास गरिएको छ । अपर मर्स्याङ्दी हाइड्रोपावर- १ ले २०७५ साल पौष १० मा विद्युत विकास विभागबाट आयोजना निर्माणको लागि विद्युत उत्पादनको अनुमतिपत्र लिएको थियो ।

साथै २०८१ पौष ९ मा नेपाल विद्युत प्राधिकरणसँग विद्युत खरिदबिक्री सम्झौतासमेत गरिसकेको छ । सो कम्पनीको प्रवर्द्धकको रुपमा केसी ग्रुप र क्याल ग्रुप रहेका छन् । सो परियोजना निर्माण गर्न लक्ष्मी सनराइज बैंकको नेतृत्त्वमा सहवित्तीयकरणमा सहभागी बैंकहरुले परियोजना लागतको ७४.७७ प्रतिशत लगानी गर्ने प्रतिबद्धता जनाएका छन् । बाँकी २५.२३ प्रतिशत रकम सो कम्पनीका प्रवर्द्धक र संस्थापकहरुको लगानी रहनेछ ।

लक्ष्मी सनराइज बैंकको प्रोजेक्ट फाइनान्स (टर्मलोन) प्रतिबद्धता ७ अर्ब रुपैया रहेको छ । सहवित्तीयकरणमा सहभागी अन्य बैंकहरुमध्ये सह-अगुवा ग्लोबलआइएमई बैंकको ६ अर्ब तथा प्रभु बैंकको ३ अर्बसमेत गरी जम्मा लगानी १६ अर्ब रहेको छ ।

सो आयोजना सन् २०२९ जुनभित्र निर्माण सम्पन्न भई विद्युत उत्पादन भएपश्चात वार्षिक करिब ५८३.०३ गिगावाट आवर इनर्जी विद्युत राष्ट्रिय प्रसारणलाइनमा जडान हुँदा यो ठूला स्वतन्त्र ऊर्जा उत्पादकमध्ये एकको रुपमा रहने विश्वास लिइएको छ ।