जय ट्रफीको पहिलो दिन: स्पिन झेल्न कठिन

काठमाडौं । नेपाल क्रिकेट संघ (क्यान)को आयोजनामा दुई दिवसीय क्रिकेट प्रतियोगिता जय ट्रफी आज सुरु भएको छ । प्रतियोगिताको पहिलो दिन पूर्ण रुपमा स्पिन बलरहरुको नियन्त्रणमा रह्यो भने ब्याट्म्यानहरुले रनका लागि संघर्ष गरे ।

विनोद भण्डारीले नेतृत्व गरेको त्रिभुवन आर्मी क्लब र आरिफ शेख नेतृत्वको नेपाल पुलिस क्लब वीरगञ्जमा भिडेका थिए । यस्तै सन्दीप लामिछाने नेतृत्वको बाग्मती र हरिशंकर साह नेतृत्वको मधेश प्रदेश क्लबको भिडन्त जनकपुरमा भएको थियो । दुई स्थान फरक स्थानमा भएका दुवै खेलको पहिलो इनिङ लो स्कोरिङ भएका छन् ।

नेपाल पुलिस क्लवले टस जितेर फिल्डिङ रोज्दै त्रिभुवन आर्मीलाई १२१ रनमा समेट्यो । बलियो ब्याटिङ पंक्ति भएको त्रिभुवन आर्मीलाई पुलिसका ललित राजवंशीले आफ्नो स्पिनमा राम्रैसँग नचाए । उनले १४.४ ओभरमा ४७ रन खर्चेर ७ विकेट आफ्नो पोल्टामा पारे । आर्मीका लागि सर्वाधिक २५ रन कुशल मल्लले बनाएका थिए ।

दोस्रो ब्याटिङमा पुलिसको पनि लगभग उही अवस्था भयो । पुलिसका ओपनर कुशल भुर्तेलले आफ्नो खराब लयलाई निरन्तरता दिँदै पहिलो बलमै आउट भए । अर्का ओपनर अर्जुन साउद पनि डकआउट भए । बिहेको दुई दिनपछि नै मैदानमा उत्रिएका कप्तान आरिफ शेखले पनि ४ रनमात्रै जोड्न सके ।

पुलिसका अन्तिम आशाका रुपमा रहेका छन् गुल्शन झा । उनी आफ्नै आक्रामक शैलीमा ब्याटिङ गर्दै ३६ बलमा ३४ रन बनाएर खेलिरहेका छन् । आजको खेल समाप्त हुँदा पुलिसले २४ ओभरमा ७ विकेट गुमाएर १०३ रन जोडेको छ ।

आर्मीका लागि पनि बायाँ हाते अर्थोडक्स स्पिनर सहाब आलमले ५ विकेट लिएका छन् । उनले ११ ओभरमा ५५ रन खर्चिएर पाँच विकेटको सफलता हात पारेका हुन् । सोमपाल कामीले एक विकेट र पवन कार्कीले १ विकेट बाँडेका थिए ।

अर्को खेलमा टस जितेर ब्याटिङ रोजेको मधेश प्रदेश १०२ रनमा समेटियो । कप्तान सन्दीप लामिछानेले घातक बलिङ गर्दै ५ विकेट लिए । यसअघि नेपाल प्रिमियर लिगमा फितलो प्रदर्शन गरेका सन्दीप जय ट्रफीमा उत्कृष्ट लयमा फर्किएका छन् । पीचले पनि उनको बलिङलाई साथ दिएको छ । सन्दीपले १४ ओभरमा ४१ रन खर्चेका थिए ।

अर्का स्पिनर सूर्य तामाङ पनि उस्तै खतरनाक देखिए । उनले २.३ ओभरमा केवल ७ रन खर्चिएर ३ विकेट लिएका छन् । नन्दन यादव र फास्ट बलर प्रतिश जीसीले एकएक विकेट बाँडे ।

जवाफी ब्याटिङमा बाग्मतीले पनि खराब सुरुवात गर्‍यो । बाग्मतीका लागि ओपनर आसुतोष घिराहिया १० बल खेल्दा शून्य रन बनाएर आउट भए भने रीत गौतमले पनि ३ रनमात्र जोड्न सके । ३ रनमै दुई विकेट गुमाएको बाग्मतीलाई ईशान पाण्डे र शुभ कंसाकारले सम्हालेका छन् । ईशान ९ रनमा र शुभ २२ रन बनाएर खेलिरहेका छन् । मधेशका लागि दुवै विकेट फास्ट बलरले लिएका थिए ।

कुल मिलाएर आज एकै दिन दुई खेलमा २९ विकेट खसेका छन् र तीमध्ये २२ विकेट स्पिनरको नाममा रह्यो । तीन स्पिनरले ५ वा सोभन्दा बढी विकेट लिए ।

‘टेस्ट थिम’ मा खेलाइएको यस प्रतियोगिताका खेलमा प्रत्येक टीमले दुई पटक ब्याटिङ गर्न पाउँछन् । एक दिनमा ९० ओभरसम्मको खेल हुन्छ भने एउटा टीमले बढीमा ६० ओभर ब्याटिङ गर्न पाउँछ ।

तर आज पहिले ब्याटिङ गरेका दुई टीमले ६० ओभर ब्याटिङ गर्ने धैर्यता र क्षमता देखाएनन् । ब्याटरहरु कोही बढी रक्षात्मक देखिए त कोही बढी आक्रामक । मधेश प्रदेश ३५.३ ओभरमा र त्रिभुवन आर्मी ३४.४ ओभरमा अलआउट भए । भर्खरै २० ओभरको प्रतियोगिता एनपीएल खेलेर आएका ब्याट्सम्यानमा त्यसैको धङधङी देखियो ।

दुइटै पीचमा ब्याटिङ सहज थिएन । खासगरी स्पिनरलाई खेल्न निकै कठिन देखिएको थियो । दुई खेलमा कुनै पनि ब्याटरले ५० रन छुन सकेका छैनन् ।

आज बनेको सर्वाधिक व्यक्तिगत स्कोर भनेको गुल्शन झाको ३४ रन हो । उनी नटआउट रहेकाले भोलि ठूलो स्कोर बनाउने अवसर छ । गुल्शनले एक दिवसीय शैलीमा ब्याटिङ गर्दै ३ छक्का र एक चौका प्रहार गरिसकेका छन् । यद्यपि उनको त्रिभुवन आर्मीसँग ३ विकेटमात्रै हातमा छन् ।

बाग्मतीका शुभ कंसाकार राम्रो लयमा देखिएका छन् । उनले २३ बलमा २२ रन बनाएर नटआउट छन् ।