मदन भण्डारी गोल्ड कप इन्डो नेपाल भलिबल प्रतियोगिता: मणिमुकुन्द अन्तिम चारमा

रुपन्देही । रुपन्देहीमा जारी मदन भण्डारी गोल्ड कप इन्डो नेपाल पुरुष भलिबल प्रतियोगितामा मणिमुकुन्द भलिबल क्लबले अन्तिम चारमा स्थान बनाएको छ । आइतबार भएको प्रतिस्पर्धात्मक खेलमा ३-२ को सेटमा पराजित गर्दै मणिमुकुन्द अन्तिम चारमा स्थान बनाएको हो ।

यसैगरी दोस्रो खेलमा गुजरात भलिबल क्लबले गल्कोट भलिबल क्लबलाई पराजित गरेको छ । गुजरातको यो प्रतियोगितामा दोस्रो जित हो ।

रामनगर खेलमैदानमा भएको पहिलो खेलमा मणिमुकुन्दले २५-२० अंकसहित जित निकाल्दै खेलमा अग्रता लिएको थियो, तर दोस्रो सेट भने आयोजक मदन भण्डारीले २५-१८ मा आफनो पोल्टामा पार्दै खेल बराबरीमा ल्यायो । मदन भण्डारीलाई तेस्रो सेटमा २५-१२ अंकको साथ पराजित गर्दै मणिमुकुन्दले खेलमा फेरि अग्रता लियो ।

चौथो सेटमा आयोजक मदन भण्डारीले २५-२० अंकका साथ अर्को जित निकाल्दै खेल पुनः बराबरीमा ल्यायो । अन्तिम सेटमा मणिमुकुन्दले १५-१२ अंकको जित निकाल्दै खेल आफ्नो पक्षमा पारेको थियो ।

दोस्रो खेलमा गुजरातले विदेशी खेलाडीसहित मैदानमा रहेको गल्कोट भलिबल क्लबलाई ३-० को सेटमा पराजित गरेको छ । एकतर्फी खेलमा गुजरातले २५-१८, २५-१९ र २५-१६ को सोझो सेटमा पराजित गरेको हो ।

सोमबार पहिलो खेलमा विभागीय टीम नेपाल पुलिस क्लबले रुकुम भलिबल क्लब तथा दोस्रो खेलमा विभागीय टीमहरु त्रिभुवन आर्मी र सशस्त्र प्रहरी बल (एपीएफ) आमनेसामने हुनेछन् ।