सकियो दोस्रो दक्षिण एसियाली पुस्तक प्रदर्शनी

काठमाडौं । काठमाडौंको भृकुटीमण्डपमा आयोजना गरिएको दोस्रो दक्षिण एसियाली अन्तर्राष्ट्रिय पुस्तक प्रदर्शनीको मौजारो आज भएको छ । सभामुख देवराज घिमिरे आजका प्रमुख अतिथि थिए । १५० भन्दा धेरै स्टल रहेको प्रदर्शनी बुधबार सुरु भएको थियो ।

नेपाल पुस्तक तथा स्टेसनरी व्यवसायी महासंघका अध्यक्ष शिव सागरले पठन संस्कृतिको विकास र पठन शैलीको निरन्तरताका लागि प्रदर्शनी आयोजना गरिएको बताए ।

प्रदर्शनीमा चीन, भारत, जिम्बावे, थाइल्यान्ड, श्रीलंका, क्यानडा र बंगलादेशलगायतका प्रकाशक तथा लेखकहरु काठमाडौं आएको उनले बताए ।

चीनको अलगै कक्ष रहेको प्रदर्शनीमा तीन लाखभन्दा धेरैले सहभागिता जनाएको महासंघले जनाएको छ । प्रदर्शनीमा १३ देशका १५० बढी लेखक तथा प्रकाशक सहभागी भएको कार्यक्रमका एक आयोजक तथा टाइम्स पब्लिकेसन्सका सीईओ पुरुषोत्तम दाहालले नेपाल प्रेसलाई जानकारी दिए ।