लुम्बिनीमा पर्यटक आगमन बढ्यो, सन् २०२४ मा ११ लाखभन्दा बढी पर्यटकको आगमन

रुपन्देही । बुद्ध जन्मस्थल लुम्बिनीमा पर्यटक आगमन उल्लेखनीय रूपमा बढेको छ।

लुम्बिनी विकास कोषका अनुसार सन् २०२४ मा कुल ११ लाख ७२ हजार ३०४ पर्यटकले लुम्बिनी भ्रमण गरेका छन्। यो संख्या अघिल्लो वर्षको तुलनामा १ लाख ७३ हजार ३६६ ले बढी हो।

कोषका सूचना अधिकारी हरिध्वज राईका अनुसार सन् २०२३ मा लुम्बिनी भ्रमण गर्ने पर्यटकको संख्या ९ लाख ९८ हजार ९३८ थियो। कोभिडपछिको पहिलो पटक आन्तरिक तथा बाह्य पर्यटकको संख्या १० लाख नाघेको बताउँदै उनले भने, “यो निकै सकारात्मक संकेत हो।”

भारतीय पर्यटकको नयाँ रेकर्ड

सन् २०२४ मा भारतीय पर्यटकको आगमनले नयाँ रेकर्ड बनाएको छ। यस वर्ष ३ लाख ८८९ भारतीय पर्यटकले लुम्बिनी भ्रमण गरेका छन्। सन् २०२३ मा यो संख्या २ लाख ६६ हजार ५१० थियो। कोभिड अघि सन् २०१९ मा २ लाख ६ हजार १७१ भारतीय पर्यटक लुम्बिनी आएका थिए।

तेस्रो मुलुकका पर्यटकमा वृद्धि

तेस्रो मुलुकका पर्यटक पनि उल्लेखनीय रूपमा बढेका छन्। सन् २०२४ मा १ लाख १४ हजार ४२५ तेस्रो मुलुकका पर्यटक लुम्बिनी आएका छन्, जुन २०२३ को तुलनामा ४६.३६ प्रतिशतले बढी हो। कोभिड अघि सन् २०१९ मा यो संख्या १ लाख ७४ हजार १५ थियो।

सबैभन्दा बढी श्रीलंकाका पर्यटकले लुम्बिनी भ्रमण गरेका छन्। सन् २०२४ मा २३ हजार ५६९ श्रीलंकन पर्यटक लुम्बिनी आए। त्यसपछि थाइल्याण्ड (२१ हजार ४९६), चीन (१३ हजार १२), म्यानमार (१० हजार ५१७), भियतनाम (८ हजार ५००), र दक्षिण कोरिया (४ हजार ६४६( का पर्यटक लुम्बिनी भ्रमणमा आएका छन्।

आन्तरिक पर्यटकको संख्या पनि बढ्दै

सन् २०२४ मा ७ लाख ५९ हजार ९९० जना आन्तरिक पर्यटकले लुम्बिनी भ्रमण गरेका छन्, जुन अघिल्लो वर्षको तुलनामा १५.८१ प्रतिशतले बढी हो। यद्यपि, कोभिडअघिको तुलनामा आन्तरिक पर्यटकको आगमन अझै अपेक्षित रूपमा वृद्धि भएको छैन।

कोभिड अघि सन् २०१७ मा साढे १२ लाख आन्तरिक पर्यटकले लुम्बिनी भ्रमण गरेका थिए। सन् २०१८ र २०१९ मा पनि आन्तरिक पर्यटकको संख्या साढे ११ लाख थियो।

सूचना अधिकारी राईका अनुसार सडक सञ्जाल र आर्थिक मन्दीका कारण आन्तरिक पर्यटकको संख्या अपेक्षित रूपमा बढ्न नसकेको हो।