लुम्बिनी अस्पतालमा एमआरआईका लागि पुनः बोलपत्र, फेरि पनि रद्द भए आन्दोलितको चेतावनी

रुपन्देही । लुम्बिनी प्रादेशिक अस्पतालमा एमआराई मेशिन खरिदका लागि पुनः बोलपत्र आह्वान भएको छ । सोमबार सार्वजनिक सूचना जारी गर्दै मेशिन खरिदका लागि बोलपत्र आह्वान गरिएको हो ।

यसैबीच अस्पतालमा एमआरआई मेशिन खरिद प्रक्रियामा विलम्ब हुँदा जनताले दुःख पाएको बताउँदै जसरी पनि यसलाई अघि बढाउन यहाँका राजनीतिक दल तथा सामाजिक संघ संस्थाका प्रतिनिधिहरूले जोड दिएका छन् ।

लुम्बिनी प्रदेशका पूर्वसामाजिक तथा स्वास्थ्यमन्त्री सुदर्शन बरालले समयमा एमआरआई मेशिन नपाउँदा सेवाग्राहीले दुःख पाएको बताउँदै सरकारले यसलाई गम्भीरताकासाथ लिनु पर्नेमा जोड दिए ।

अस्पतालमा मेशिन खरिद प्रक्रियालाई अघि बढाउनु पर्नेमा जोड दिँदै उनले कुनै पनि आर्थिक चलखेल वा बहानामा जनताले दुःख पाउन नहुने उल्लेख गरे ।

यसै गरी पूर्व स्वास्थ्य मन्त्री तथा लुम्बिनी प्रदेशसभा सदस्य भोजप्रसाद श्रेष्ठले अबको टेन्डर प्रक्रियाबाट जसरी भए पनि एमआरआई मेशिन खरिद हुने उल्लेख गरेका छन् ।

‘कुनै पनि बहानामा मेशिन खरिद प्रक्रिया रोकिँदैन, यसमा प्रदेश सरकार, स्वास्थ्य मन्त्रालय तथा अस्पताल प्रशासन प्रतिबद्ध भैसकेका छन् ।’–श्रेष्ठले भने, अब कुनै पनि हालतमा टेन्डर प्रक्रिया रद्द हुँदैन यदि त्यसो भयो भने सबै कानूनी प्रक्रिया सार्वजनिक गरेर अगाडि बढ्न सरकार प्रतिबद्ध छ ।’

नेपाली काँग्रेसका रुपन्देही जिल्ला सभापति तथा तिलोत्तमा नगरका मेयर रामकृष्ण खाँणले मेशिन खरिद प्रक्रियामा सप्लायर्स कम्पनीहरूले नै अनावश्यक चलखेल गर्दा समस्या भएको उल्लेख गरे ।

टेन्डर प्रक्रिया फेरी पनि रद्द भयो भने जनताले अझ बढी समय दुःख पाउने बताउँदै उनले अस्पतालको क्षमता आवश्यक तथा पूँजीको आधारमा खरिद प्रक्रियालाई अघि बढाउनु पर्नेमा जोड दिए ।

नेकपा एमाले रुपन्देही अध्यक्ष यज्ञ गैरेले मेशिन खरिद प्रक्रियालाई पारदर्शी गराएर अघि बढ्न पर्ने बताउँदै जनताको स्वास्थ्यसँग जोडिएको संवेदनशील कुरालाई अनावश्यक गिजोल्ने र ढिलासुस्ती गर्ने काम ठिक नभएको उल्लेख गरे ।

पटक–पटक प्रक्रिया रद्द गर्ने र खुलाउने गर्दा स्वास्थ्य सेवामा गम्भीर लापरबाही हुने बताउँदै उनले कसैले प्रश्न नउठाउने गरी यस पटकको टेन्डर प्रक्रियाबाट मेशिन खरिद गर्ने कामलाई सम्पन्न गर्नुपर्नेमा जोड दिए ।

नेकपा माओवादी केन्द्रका रुपन्देही अध्यक्ष नारायण जी.सी. (निर्मल) ले एमआरआई मेशिन खरिदका लागि गरिएको टेन्डर प्रक्रिया फेरी पनि रोकिएमा वा स्थगित भएमा जनतालाई आन्दोलित गराउने चेतावनी दिएका छन् ।

‘विभिन्न बहानाले मेशिन खरिद प्रक्रिया रोकिँदा सेवाग्राहीले सास्ती पाएका छन्,’ उनले भने, ‘अब पनि त्यस्तो भयो भने हामीले जनता उतार्छौ, आन्दोलन गर्छौँ ।’

उपभोक्ता हित संरक्षण मञ्च रुपन्देहीका अध्यक्ष समुन्द्र जी.सी.ले अब पनि टेन्डर प्रक्रिया रद्द हुने र मेशिन खरिदमा विलम्ब भएमा सार्वजनिक रूपमा खबरदारी गर्न बाध्य हुने उल्लेख गरे । ढिलासुस्तीले जनताको स्वास्थ्य सेवा पाउने अधिकारबाट वञ्चित भएको उल्लेख गर्दै कुनै पनि हालतमा मेशिन खरिद प्रक्रियालाई टुङ्गोमा पुर्‍याउनु पर्नेमा जोड दिए ।

यसैगरी बुटवल उद्योग वाणिज्य संघका अध्यष हरिप्रसाद अर्यालले अस्पतालमा मेशिन ल्याउने कुरा धेरै लामो समयदेखि चर्चाको विषय भए पनि पूर्णता पाउन नसकेको गुनासो गर्दै छिटो टुङ्गोमा पुर्‍याउनु पर्नेमा जोड दिए ।

यसलाई कुनै राजनीतिक स्वार्थको विषय नबनाई विधि र कानूनी प्रक्रिया पूरा गरी मेशिन खरिद गर्नुपर्ने बताए । समयमा मेशिन खरिद हुन नसक्दा जनताले महँगो शुल्क तिरेर निजी अस्पतालमा जानुपर्ने बाध्यता रहेको बताउँदै उनले सरकारी अस्पतालमै सेवा लिने वातावरण मिलाउनु पर्नेमा जोड दिए ।

जसरी पनि एमआरआई ल्याउँछौँ : स्वास्थ्य मन्त्री सारु

जसरी पनि एमआरई मेशिन ल्याउने प्रदेश सरकार स्वास्थ्य मन्त्रालय, अस्पताल विकास समिति तथा अस्पताल प्रशासनको प्रतिबद्धता अनुसार पुनः बोलपत्र आह्वान गरिएको हो ।

अस्पतालमा एमआरआई मेशिन ल्याएर जनतालाई सहुलियत शुल्कमा स्वास्थ्य सेवा उपलब्ध गराउन भएका प्रतिबद्धतालाई पूरा गर्न विगतमा देखा परेका कमजोरीहरूलाई सुधार गर्दै प्राप्त सुझाव तथा छलफलका आधारमा नयाँ बोलपत्र आह्वान गरिएको स्वास्थ्यमन्त्री खेमबहादुर सारुले बताए ।

मेशिन खरिदका लागि यसअघि आह्वान गरिएको बोलपत्रमा देखिएका प्राविधिक त्रुटिहरूलाई आवश्यक छलफल, विज्ञहरूको सुझाव, सार्वजनिक खरिद ऐनको अध्ययन तथा सरोकारवाला निकायहरूसँग छलफल गरी पुनः बोलपत्र आह्वान गरिएको बताउँदै लुम्बिनी प्रदेशका स्वास्थ्य सचिव वासुदेव उपाध्यायले पारदर्शी, प्रतिस्पर्धी र मितव्ययी हुने गरी नयाँ प्रक्रियामा खरिद प्रक्रियालाई अघि बढाइएको उल्लेख गरे ।

अस्पताल विकास समितिका अध्यक्ष अजयमान श्रेष्ठले विगतमा एमआरई मेशिन खरिद प्रक्रियालाई अघि बढाउँदा विभिन्न बहानामा भएका अबरोध र त्रुटिहरूलाई सच्याएर अघि बढिएको दाबी गरे ।

समयमा मेशिन खरिद गर्न नसक्दा सेवाग्राहीले निजी स्वास्थ्य संस्थामा गएर महँगो शुल्क तिर्नुपर्ने बाध्यताको अन्त्य गर्न अस्पताल विकास समिति प्रतिबद्ध रहेको उल्लेख गरे ।

अस्पतालमा सेवाग्राहीको बढ्दो चापसँगै यहाँको सेवा बिस्तार, गुणस्तर सुधार तथा प्रविधिमैत्री सेवा बनाउनका लागि अस्पताल विकास समितिले पहल गरिरहेको उनले बताए ।

विगत ४ वर्ष लामो समयदेखिको प्रयासमा पनि अस्पतालमा एमआरआई मेशिन ल्याउन नसक्नु दुःखद भएको बताउँदै अध्यक्ष श्रेष्ठले यसलाई सफल बनाउनका लागि यहाँका राजनीतिक दल, सामाजिक संघ-संस्था, मिडियाकर्मी तथा सरोकारवाला सम्बद्ध सबै पक्ष गम्भीर र प्रतिबद्ध हुनुपर्नेमा जोड दिए ।

अस्पतालका मेडिकल सुपरिटेन्डेन्ट डा. इन्द्र ढकालले एमआरआई मेशिन खरिद भएमा सेवाग्राहीले निजी स्वास्थ्य संस्थामा गएर १६/१७ हजार शुल्क तिरेर सेवा लिनुपर्ने बाध्यता अन्त्य भई आधा मूल्यमा सेवा प्रदान गर्न सकिने उल्लेख गरे ।

यसै गरी अस्पतालमा सामाजिक सुरक्षा कार्यक्रमबाट सेवा लिन आउने बिरामी, लक्षित वर्ग, विपन्न तथा गरिब परिवारका लागि ठूलो राहत पुग्ने उल्लेख गरे ।

मेशिन खरिदका लागि यसअघि आह्वान गरिएको बोलपत्रमा समेत विज्ञहरूको सुझाव, सार्वजनिक खरिद ऐन, आपूर्तिकर्ता कम्पनीहरुको राय अनुसार स्पेसिफिकेशन तयार पारिएको भए पनि त्यसमा थप सुधार गर्दै सप्लायर्स कम्पनीहरूको अधिकतम सहभागिता रहने गरी खरिद प्रक्रियालाई प्रतिस्पर्धी र पारदर्शी गराइएको जनाए ।

खरिद कार्यलाई अझ पारदर्शी र प्रतिस्पर्धी बनाउन सार्वजनिक खरिद अनुगमन कार्यालयमा सम्पूर्ण कागजात सहित आवश्यक राय सुझाव माग गरी प्राप्त निर्देशनको पालना गरिएको, राष्ट्रिय सतर्कता केन्द्रबाट समेत सुझाव माग गरिएको तथा सार्वजनिक खरिद ऐनलाई अक्षरशः पालना गरी नयाँ प्रक्रियालाई अघि बढाइएको उल्लेख गरे ।

विगतमा समेत कुनै नियतवश नभै केही प्रविधि त्रुटि भएकाले यस पटक जसरी पनि मेशिन खरिद गर्ने उद्देश्यसाथ अघि बढिएको बताउँदै उनले सबैको सुझाव र सहयोगको अपेक्षा गरे ।

अस्पतालमा सेवा बिस्तार कार्यक्रम अन्तरगत प्रसूति सेवाका लागि छुट्टै अपरेसन थिएटर स्थापना गरी पुरानो थिएटरबाट अन्य सेवातर्फको शल्यक्रिया हुने व्यवस्था मिलाइएको, अनलाइन टिकेटिङ सेवा, अनलाइन भुक्तानी सेवा, टिकट काउन्टरको संख्या वृद्धि लगायतका विभिन्न योजनाकासाथ अघि बढेको उनले उल्लेख गरे ।

लुम्बिनी प्रदेश मात्र नभई अन्य प्रदेशका जिल्लाहरूबाट समेत दैनिक हजारौँको संख्यामा सेवा लिन आउने अस्पतालमा उपकरण तथा प्रविधिले सम्पन्न हुन आवश्यक रहेको उनले बताए ।

जनशक्तिको व्यवस्थापन तथा आवश्यक स्वास्थ्य उपकरण थप गरी सेवालाई गुणस्तर गराउन अस्पताल प्रशासन प्रतिबद्ध रहेको बताउँदै उनले यहाँका सबै सरोकारवाला निकायले सहयोगको अपेक्षा व्यक्त गरे ।

लुम्बिनी प्रदेश सकारको गौरव आयोजनाको रूपमा रहेको यस अस्पताललाई १२ सय सैय्यामा स्तर वृद्धिका लागि अन्डरग्राउण्डसहित १२ तले अत्याधुनिक भवन निर्माणका काम भइरहेको छ ।

लुम्बिनी प्रदेशसहित छिमेकी प्रदेशका जिल्लाहरू समेत गरी यहाँ १६ बढी जिल्लाका सेवाग्राही आउने गर्दछन् । अस्पतालबाट गत आर्थिक वर्षमा मात्रै साढे ३ लाखले स्वास्थ्य सेवा लिएको तथ्याङ्क रहेको छ ।