माओवादी बैठक- प्रचण्डको राजनीतिक प्रस्तावमा छलफल जारी

काठमाडौं । नेकपा माओवादी केन्द्रको केन्द्रीय कमिटीको दोस्रो दिनको छलफल सुरु भएको छ। आइतबारदेखि काठमाडौंको धुम्बाराहीस्थित स्मार्ट दरबारको सभाहलमा बैठक अहिले जारी छ।

दोस्रो दिनको बैठकमा अध्यक्ष प्रचण्डले संक्षिप्त धारणा राखेपछि राजनीतिक प्रस्तावमा छलफल चलिरहेको छ। प्रतिवेदनमाथि बोल्ने नेताहरूलाई तीन मिनेट समय निर्धारण गरिएको छ।

हिजोको बैठकमा प्रचण्डले राजनीतिक एवं सांगठनिक प्रतिवेदन पेश गरेका थिए। उनले पार्टीप्रति देशभर सकारात्मक वातावरण सृजना भएको दाबी गर्दै जनतातिर फर्किएर अभियान चलाउने प्रस्ताव राखेका छन्।

प्रचण्डले कांग्रेस र एमालेसँग चुनावी गठबन्धन नगर्ने तर माधव नेपालदेखि प्रभु साहसँग एकताको प्रयास गर्ने प्रस्ताव राखेका छन्।

यस्तै, नेताहरूको जीवनशैलीमा जनताले प्रश्न उठाएको भन्दै आगामी फागुन १ भित्र केन्द्रदेखि प्रदेश तहसम्मका सबै नेताहरूले अनिवार्य सम्पत्ति विवरण बुझाउनुपर्ने पनि प्रस्ताव प्रतिवेदनमा उल्लेख छ। बुधवारसम्म चल्ने बैठकले पार्टीको आगामी योजनाबारे निर्णय गर्नेछ।