वामदेवलाई नेकपा एसमा भित्र्याउने कुरा कहाँ पुग्यो ? गौतम भन्छन्- एमालेबाट पनि कुरा आएको छ

काठमाडौं । एमालेका पूर्वउपाध्यक्ष एवं पार्टी एकता राष्ट्रिय अभियानका संयोजक वामदेव गौतमलाई माधव नेपाल नेतृत्वको नेकपा (एकीकृत समाजवादी) मा भित्र्याउने कुरा अझै टुंगोमा पुगेको छैन ।

गत साता एकीकृत समाजवादीको नेतृत्वले गौतमसँग गरेको वार्तामा उनका सम्पूर्ण माग र चाहनालाई पूरा गर्ने जिम्मेवारी महासचिव घनश्याम भुसाल र स्थायी कमिटी सदस्य बलराम बास्कोटालाई दिइएको थियो । त्यसअनुसार सम्पूर्ण तयारी सकिएको बास्कोटाले नेपाल प्रेसलाई बताए । तर, गौतमले आफू नेतृत्वको एकता अभियानको बैठकबाट केही पनि निर्णय नभएको र २७ गते निर्णय गर्ने बताए । आइतबार महासचिव भुसाल र स्थायी कमिटी सदस्य बास्कोटा आफूलाई भेट्न आएको पनि उनले बताए ।

‘घनश्याम र बलराम आउनुभयो, तपाईँका सबै माग पूरा गरिदिएका छौँ भन्नुभयो’, गौतमले नेपाल प्रेससँग भने । तर, आफ्नो पार्टीको बैठक पुस २७ मा बोलाइएको र उक्तको निर्णयअनुसार कुन पार्टीसँग एकता गर्ने भन्ने टुंगो लाग्ने उनले बताए । ‘धेरै कुरा एकीकृत समाजवादीसँगै भएको छ, छलफल पनि राम्रोसँग भएको छ’, उनले भने, ‘केही साथीहरूले एमालेसँग पनि कुरा भएको भन्नुभएको छ, उहाँहरूको पनि कुरा सुनेपछि निर्णय गर्ने हो ।’

वामदेवलाई एकीकृत समाजवादीमा भित्र्याउने काममा निरन्तर लागि परेका स्थायी कमिटी सदस्य बास्कोटा भने सबै कुरा टुंगिसकेको बताउँछन् ।

‘हामीलाई दिइएको जिम्मेवारी पूरा गरेका छौँ, त्यो कुरा पार्टी अध्यक्षलाई रिपोर्टिङ गर्न बाँकी छ’, उनले भने ।

गौतमको एकता अभियानका नेता डीबी कार्कीले आफूहरूले एकीकृत समाजवादीसँग एकता गर्ने कुरालाई करिब करिब पक्कापक्की गरिसकेको र २७ गते बैठकबाट औपचारिक निर्णय गरिने बताए । तर, एमालेको जारी केन्द्रीय कमिटीको बैठकले विश्व र राष्ट्रिय कम्युनिष्ट आन्दोलनलाई हेर्ने दृष्टिकोण कसरी बनाउँछ भन्ने कुराको प्रतीक्षा गरेको उनले बताए ।

‘उसले एकताको पहल लिने, कम्युनिष्ट आन्दोलनलाई एकीकृत गरेर लैजानुपर्छ भन्ने कुरा पास गर्‍यो भने हामी मात्र हैन, एकीकृत समाजवादीलाई पनि सँगसँगै जाऔँ भन्छौँ’, उनले भने, ‘एमालेले नै एकताप्रति रुचि देखाएन भने उसको बाटो हेरेर हामी बस्दैनौँ ।’