माओवादी बैठकमा प्रचण्ड- पार्टीमा आन्तरिक एकता कायम हुँदैछ, महाधिवेशनबाट सबै समस्या हल हुन्छ

काठमाडौं । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ ले पार्टीभित्रको आन्तरिक एकता कायम हुँदै गएको दाबी गरेका छन् । दोस्रो दिनको केन्द्रीय कमिटीको बैठकअघि संक्षिप्त धारणा राख्दै पार्टीभित्र उठेको सबै मतलाई समेटेर अघि बढेको बताए ।

उनले भने, ‘अहिले पार्टीभित्र आन्तरिक एकता हुँदैछ । सबैलाई समेटेर अघि बढेको छु । जनार्दन शर्मा र हरिबोल गजुरेललगायतको मतलाई पनि सम्बोधन गर्नेगरी प्रस्ताव ल्याएको छु ।’

उपमहासचिव शर्मासहित पार्टीका अधिकांश नेताहरूले यो बैठकबाट पूर्वनिर्धातिर विशेष महाधिवेशनमा लैजानुपर्नेमा जोड दिएका छन् । विशेष महाधिवेशनबाट पार्टीमा नेतृत्व चयनका लागि निर्वाचन प्रणाली स्थापित गर्नुपर्ने उनीहरूको भनाइ छ ।

तर, प्रचण्डले पार्टीभित्र समेट्न बाँकी रहेको मतलाई आगामी महाधिवेशनबाट समाधान गर्नेगरी प्रस्ताव ल्याएका छन् । उनले अहिले सबै मिलेर पार्टी निर्माण गर्न एकजुट हुनुपर्ने भन्दै आफ्नो प्रस्ताव कसैको नकारात्मक भाष्य बनाउनेतिर नभएको बताए । उनले अब पार्टीले ६ महिना जनजागरण अभियान चलाएर ९ औं महाधिवेशनको मिति तोक्नुपर्ने बताएका छन् ।

माओवादीको जारी बैठकमा अहिले अध्यक्ष प्रचण्डको राजनीतिक प्रतिवेदनमाथि नेताहरूले धारणा राख्ने क्रम चलिरहेको छ ।