काठमाडौंसहित शहरी क्षेत्रमा माओवादीलाई ‘नम्बर वान’ बनाउन प्रचण्डको यस्तो कार्ययोजना

काठमाडौं । नेकपा माओवादी केन्द्रका अध्यक्ष पुप्पकमल दाहाल ‘प्रचण्ड’ ले काठमाडौं उपत्यकासहित शहरी क्षेत्रको जनमत बढाउने कार्ययोजना पेस गरेका छन् । जारी केन्द्रीय कमिटीको बैठकमा शहरी क्षेत्रमा जनमत बढाउने केही योजना सार्वजनिक गरेका हुन् ।

काठमाडौं उपत्यकासहित शहरी क्षेत्रमा माओवादीको जनमत कमजोर छ । प्रचण्डले उपत्यकाको ऐतिहासिक पुरातात्विक सांस्कृतिक महत्वको व्यक्तित्व, संस्था र सम्पदाहरूको जगेर्ना गर्ने, सहरीकरणको बसोबास व्यवस्थित बनाउने, पराम्परागत सम्पदा, सांस्कृतिक धरोहर र संस्कृति रक्षासहितको विकास, फोहोर व्यवस्थापन, खानेपानी र ढल निकासको व्यवस्थामा जोड दिनुपर्ने प्रस्ताव अघि सारेका छन् ।

यस्तै, सार्वजनिक यातायातको व्यवस्थापन, नदी किनारका बस्तीहरुको व्यवस्थापन, सुकुमबासी समस्या समाधानलगायतका विषय उल्लेख गरेका छन् ।

माओवादीको जारी बैठकमा अहिले अध्यक्ष प्रचण्डको राजनीतिक प्रस्तावमाथि नेताहरूले आफ्नो धारणा राखिरहेका छन् ।