विश्वप्रख्यात डान्स शो ‘डब्लुओडी’ नेपालमा भित्रियो, विजेता टीमले अमेरिका जान पाउने

काठमाडौं । विश्वका २५ देशहरूमा हुँदै आएको डान्सको चर्चित स्टेज ‘वर्ल्ड अफ डान्स’ (डब्लुओडी) अब नेपालमा पनि हुने भएको छ । नृत्यमा भविष्य खोज्नेहरूका लागि उत्कृष्ट मानिने यस स्टेजको फ्रेन्चाइज मण्डला इन्टरटेनमेन्टले नेपाल भित्र्याएको हो ।

‘वर्ल्ड अफ डान्स’ नेपाल आगामी माघ २४ गते बिहीबार हुने आयोजकले जनाएको छ । हालै एक पत्रकार सम्मेलन गरि जुरी टिम, ट्रफिसँगै बिजेताले पाउने पुरस्कार लगायतका विषयमा जानकारी गराइयो ।

यसमा देशैभरीबाट आवेदन परेका डान्सरहरूले विभिन्न चरण पार गर्दै बिजेता बन्न सक्नेछन् । अहिलेसम्म डिजिटल अडिसनबाट तीन सयभन्दा बढीको आवेदन परेको र छनौटको काम भइरहेको आयोजकले जनाएको छ ।

यो रियालिटी शो नभई एक डान्स कम्पिटिसन हो, जसमा डिजिटल, फिजिकल अडिसन पार गर्दै बिजेता छनौट गरिनेछ । बिजेता टिमले अमेरिकामा यही २०२५ जुलाई १६ देखी जुलाई २१ सम्म आयोजना हुने वर्ल्ड अफ डान्समा सहभागी जनाउन पाउनेछन्, जसमा २५ देशका बिजेताहरूबीच प्रतिस्पर्धा हुनेछ ।

यसमा सहभागी हुने टीमहरूलाई तीन डिभिजनमा राखिएको छ । पहिलो अपर टीम डिभिजन, यसमा जुनसुकै उमेर समूहका डान्सरले सहभागी लिन पाउनेछन् । साथै यसमा एकजना, दुईजना, तीनजना अथवा चारजनासम्मको एक टीम बनेर डान्स गर्न पाउनेछन् । दोस्रो सिनिअर टीम डिभिजन, यसमा १८ वर्षभन्दा बढी उमेरका डान्सरले सहभागी हुन पाउनेछन् । तेस्रो जुनिअर टीम डिभिजन, जसमा १८ वा १८ वर्षभन्दा मुनिका डान्सरहरूले सहभागी हुन पाउनेछन् ।

सहभागी तीन डिभिजनकै बिजेताले एक/एक लाख नगद पुरस्कार पाउनेछन् । यस्तै अमेरिकामा हुने डब्लु.ओ. डीमा भने सिनिअर र जुनिअर टीम डिभिजनमा बिजेतासँगै दोस्रो र तेस्रो स्थान हासिल गर्ने टीमले पनि सहभागी जनाउन पाउनेछ ।

सिनिअर टीम डिभिजन र जुनिअर टीम डिभिजनले मात्र अमेरिकामा हुने डब्लु.ओ.डी. मा सहभागी हुन पाउने पाउने प्रावधान रहेको शोका नेशनल डिरेक्टर रोशन गहतराजले जानकारी दिए । नेपालमा अहिलेसम्म नृत्यकै लागl भनेर यस्तो किसिमका शो नआएको भन्दै उनले डब्लु.ओ.डी. नेपाल नृत्यमा भविष्य बनाउन चाहनेहरुका लागि उत्कृष्ट शो बन्ने विश्वास दिलाए ।

शोको जुरी टिममा निशान गौचन, जेडी तमु र मुकेश ढकाल रहेका छन् । शोको इभेन्ट कन्सल्टेन्टको रुपमा अभिनेता प्रशान्त ताम्राकार रहेका छन् ।