जय ट्रफीमा मयन यादवले बनाए पहिलो शतक, बागमतीविरुद्ध मधेशको शानदार कमब्याक

काठमाडौं । हिजो सुरु भएको दुई दिवसीय जय ट्रफीमा पहिलो शतक मधेश प्रदेशका ओपनर मयन यादवले बनाएका छन् ।

बागमती प्रदेशविरुद्ध विष्फोटक व्याटिङ गर्दै उनले १०२ बलमै शतक पूरा गरे ।

मधेशको दोस्रो इनिङमा मयनले शतक हानेका हुन् । पहिलो इनिङमा मधेश १०२ रनमै अलआउट भएको थियो । बागमतीले पहिलो इनिङमा १५० रन जोड्दै ४८ रनको अग्रता लिएको थियो ।

तर, दोस्रो इनिङमा मधेसशले शानदार कमब्याक गरेको छ ।

मयनले १०८ बलमा १०६ रन बनाएर आउट भएका छन् । उनले १२ चौका र २ छक्का प्रहार गरे । बागमतीका कप्तान सन्दीप लामिछानेले मयनको विकेट लिए ।

पहिलो इनिङमा पाँच विकेट लिएका सन्दीपले दोस्रोमा पनि चार विकेट हात पारिसकेका छन् । यद्यपि, दोस्रो इनिङमा उनी केही खर्चिलो बनिरहेका छन् ।

मधेशका अन्य ब्याटरहरु खासै नचल्दा मयन एक्लैले टिमलाई अघि बढाएका थिए । कप्तान हरिशंकर साह १२ बलमा ११ रन बनाएर आउट भए । यस्तै, निरज यादवले १७ बलमा १७ रन बनाए । अहिले क्रिजमा अभिषेक तिवारी र रुपेश सिंह छन् ।

यो समाचार लेख्दासम्म मधेसले ६ विकेट क्षतिमा १८८ रन बनाएर खेलिरहेको छ । मधेसले १४० रनको अग्रता लिइसकेको छ । हिजोको तुलनामा आज ब्याटिङ केही सहज देखिन्छ ।