लयमा सन्दीप : मधेशविरुद्ध दोस्रो इनिङमा पनि खसाले ५ विकेट

काठमाडौं । जय ट्रफीमा बागमती प्रदेशका कप्तान सन्दीप लामिछानेले लगातार इनिङमा पाँच विकेट लिएका छन् । मधेश प्रदेशविरुद्ध पहिलो इनिङमा पाँच विकेट लिएका सन्दीपले दोस्रोमा पाँच विकेट थपेर आफ्नो विकेट संख्या १० पुर्याए ।

सन्दीपको घातक बलिङमा मधेश प्रदेश पहिलो इनिङमा १०२ रनमै समेटिएको थियो । दोस्रोमा भने मधेशका ओपनर मयन यादवले विष्फोटक सतक बनाउँदै टिमलाई खेलमा फर्काए । अर्कोतिर बाग्मतीका कप्तान लामिछाने पनि उच्च लयमा देखिएका छन् । यो खेल मयन भर्सेस लामिछानेजस्तो बनेको छ ।

दोस्रो इनिङमा लामिछानेविरुद्ध मयनले निकै आक्रामक अन्दाजमा ब्याटिङ गरे । निर्भिकरुपमा उनले लामिछानेको बलमा चौका र छक्का वर्षाएका थिए । अन्तमा उनी लामिछानेकै शिकार बने ।

लामिछानेले १४ ओभर बलिङ गर्दा ७६ रन खर्चेर पाँच विकेट पूरा गरेका छन् । उनलाई अधिकांस रन मयनले नै हानेका थिए । यो समाचार लेख्दासम्म मधेसले १९६ रन बनाउँदा ७ विकेट गुमाएको छ । बाग्मतीविरुद्ध मधेसले १४८ रनको अग्रता लिइसकेको छ ।