पूर्वउपराष्ट्रपति पुनको सक्रियताबारे माओवादी बैठकमा बहस- समाजमा सकारात्मक सन्देश गएको छैन

काठमाडौं । नेकपा माओवादी केन्द्रका नेताहरुले पूर्वउपराष्ट्रपति नन्दबहादुर पुन फेरि सक्रिय राजनीतिमा आउँदा राम्रो सन्देश नगएको भन्दै विरोध जनाएका छन् । जारी केन्द्रीय कमिटीको बैठकमा बोल्दै नेता सुदन किराँतीले पूर्वउपराष्ट्रपति पुन राजनीतिमा आउने हल्लाले समाजमा सकारात्मक सन्देश नगएको बताए ।

उनले भने, ‘पार्टीले सम्माननीयलाई अझ सम्माननीय बनाउन सक्नुपर्छ । आलोचनाभन्दा माथि राखौं, बरु पाठशाला बनाऔं । १२ हातको सरस्वतीलाई ३ हातको मन्दिरमा नराखौं ।’

पुन सक्रिय राजनीतिमा फर्किएर केन्द्रीय कमिटीको बैठकमा पनि सहभागी छन् । उनी अध्यक्ष प्रचण्डसँग उपाध्यक्षको रोमा बसेका छन् । यद्यपि उपाध्यक्ष बनाउने तयारी रहेको भए पनि अहिलेसम्म जिम्मेवारी तोकिएको छैन ।

प्रचण्डले पेश गरेको राजनीतिक प्रतिवेदन राम्रो भए पनि पार्टी धेरै बिग्रिसकेकाले कार्यान्वयन चुनौतीपूर्ण रहेको किराँतीले बताए ।

उनले भने, ‘यो प्रतिवेदन कार्यान्वयन गरेर पार्टीलाई रुपान्तरण र पुनर्निर्माण गर्न सके हाम्रो दुःखको ओरालो यात्रा अन्त्य र सुखको उकालो यात्रा प्रारम्भ हुनेछ । आममान्छेले बुझ्न र भन्न थालेका छन्, प्रचण्ड नेतृत्व सरकारले असल काम गरेको छ, ओली सरकारले खराब काम गरेको छ ।’

प्रचण्डमा भएको लेनिनभन्दा पनि बढी जनवादी प्रवृत्तिले समग्रमा सकारात्मक परिस्थितिको घनत्व माओवादीको पक्षमा बढाएको उनले जिकिर गरे ।

उनले थपे, ‘हामीलाई गर्व छ, हामीसँग कुशल नेतृत्व छ । परिस्थिति पनि हाम्रो पक्षमा छ, तर समग्र परिस्थितिको नेतृत्व गर्दै देशको जिम्मा लिन एक अनुशासित र शक्तिशाली पार्टी चाहिन्छ । त्यस्तो पार्टी निर्माणको लागि विचार र विधिको विकास गर्नुपर्छ ।’

उनले यही बैठकबाट विशेष महाधिवेशनको मिति घोषणा गर्न माग गरे ।

उनले भने, ‘केन्द्रीय समितिलाई आयोजक समितिमा बदलौं । प्रचण्ड नेतृत्वको आवश्यकतालाई फेरि पुष्टि गरौं । एक केन्द्रीय सदस्य एक पालिका र महानगरमा एक वडा लिउँ अभियान परिणाम मुखी बनाउँ ।’