यजुबेन्द्र चहलको वैवाहिक जीवन भड्खालोमा, अर्कै युवकको अंगालोमा भेटिइन् धनश्री

काठमाडौं । भारतीय क्रिकेटर यजुबेन्द्र चहलको वैवाहिक जीवन संकटमा परेको छ । कोरियोग्राफर पत्नी धनश्री बर्मासँग उनको चाँडै डिभोर्स हुनसक्ने वा भइसकेको अड्कलवाजीहरु हुन थालेका छन् । यो जोडीको दाम्पत्य सम्बन्ध सुखद नरहेको चर्चा करिब दुई वर्ष अगाडिबाटै भइरहेको थियो ।

सन् २०२२ मा धनश्रीले सोसल मिडिया अकाउन्टमा आफ्नो नामबाट ‘चहल’ हटाइदिएपछि उनीहरुबीच सबै ठीकठाक नरहेको संकेत मिलेको हो । अहिले आएर दुवैले इन्स्टाग्रामबाट एक–अर्कालाई अनफलो गरिदिएका छन् ।

यति मात्र होइन । चहलले आफ्नो इन्स्टा अकाउन्टबाट धनश्रीसँगका सबै तस्विर र भिडिओहरु समेत हटाएका छन् । धनश्रीले भने विवाह र ईंगेजमेन्टका तस्विरहरु हटाएकी छैनन् । केही भारतीय मिडियाले धनश्री र चहल तीन महिनादेखि अलग–अलग बसिरहेको समाचार प्रकाशित गरेका छन् ।

चहल र धनश्रीको भेट कोरोनाकालमा भएको थियो, जतिबेला चहल धनश्रीसँग डान्स सिक्न पुगेका थिए । डान्स सिक्ने र सिकाउने क्रममा उनीहरु प्रेममा परे । सन् २०२० मा उनीहरुको विहे भयो । तर, चाँडै नै सम्बन्धमा दरार आयो ।

धनश्री अर्का भारतीय क्रिकेटर श्रेयस ऐयरसित नजिकिएपछि श्रीमानसँग सम्बन्ध बिग्रेको बताउने गरिन्छ । धनश्री र श्रेयसले सँगै डान्स गरेको भिडिओ भाइरल भएको थियो । खासमा श्रेयसकी बहिनी र धनश्री मिल्ने साथी थिए । बहिनीमार्फत नै श्रेयस धनश्रीसँग नजिकिए । उनीहरु धेरै ठाउँमा सँगै भेटिए तर अफेयरमा रहेको पुष्टि भने भएन ।

यद्यपि, अहिले भने धनश्रीको नाम अर्कै युवकसित जोडिएको छ । ती युवक हुन् कोरियोग्राफर प्रतिक उतेकर । धनश्री र प्रतिकको एउटा तस्विर अहिले व्यापकरुपमा भाइरल भइरहेको छ । तस्विरमा प्रतिकले धनश्रीलाई कसिलो अंगालोमा बेरेका छन् र धनश्री रोमाञ्चित देखिएकी छन् । टिभी लियालिटी शो ‘झलक दिखलाजा’ को एउटा पार्टीमा उनीहरु यसरी एक–अर्कासँग लपेटिएका थिए ।

धनश्री र प्रतिकबीच कस्तो सम्वन्ध हो भन्ने खुलेको छैन । तर, यही तस्विरका आधारमा उनीहरु अफेयरमा रहेको अड्कल गर्न थालिएको छ । चहलका फ्यानहरुले धनश्रीलाई निकै गालीगलौज गरिरहेका छन् ।

चहलसँग विहे गरेर नाम कमाएपछि उनलाई लात हानेर हिँडेको आरोप धनश्रीमाथि लगाइएको छ । थुप्रै मानिसहरुले चहल र धनश्री मिल्ने जोडी नै नभएको र उनीहरुको डिभोर्स अवश्यम्भावि भएको दावी पहिल्यैदेखि गरिरहेका थिए ।