प्रचण्डको प्रस्तावमा ‘सर्वसम्मत धारणा’ आएको भन्दै आजै बैठक टुंग्याउने तयारी

काठमाडौं । नेकपा माओवादी केन्द्रको केन्द्रीय कमिटी बैठक आजै टुंग्याउने तयारी भएको छ ।

आइतबारबाट जारी बैठकमा तेस्रो दिनको छलफल जारी छ । बैठकको सुरूमा अध्यक्ष प्रचण्डले संक्षिप्त धारणा राख्दै राजनीतिक प्रस्तावमा सबैको सर्वसम्मत धारणा आएकाले आज दिउँसो २ बजेसम्म प्रस्तावमाथि छलफल प्रक्रिया सकेर निर्णय प्रक्रियामा अघि बढ्ने जानकारी गराएको प्रचण्ड सचिवालयले जनाएको छ ।

यसअघि बैठक भोलि टुंग्याउने तयारी भएको थियो । बैठकले अध्यक्ष प्रचण्डसहित सबै नेता कार्यकर्ता श्रम र उत्पादनसँग जोडिनुपर्ने निष्कर्ष निकालेको छ ।

माओवादीलाई अहिले अवसर प्राप्त भएकाले एकताबद्ध भएर पार्टी निर्माणमा जानुपर्नेमा नेताहरू एकमत रहेका प्रवक्ता अग्निप्रसाद सापकोटाले बताए ।

पार्टीले विभिन्न अभियान चलाएर मात्रै महाधिवेशनको मिति तोक्ने तयारी छ । यद्यपि नेताहरूले पूर्वनिर्धारित विशेष महाधिवेशन गर्नुपर्ने कुरा पनि उठाइरहेका छन् ।

यसबाहेक प्रचण्डले पेस गरेको राजनीतिक प्रस्ताव पाससँग पार्टी निर्माणलगायत पछिल्ला समसायिमक राजनीतिक घटनाक्रबारे पनि बैठकले निर्णय लिने तयारी गरेको छ ।