सामाजिक सुरक्षा कोष र राप्ती स्वास्थ्य विज्ञान प्रतिष्ठानबीच स्वास्थ्योपचार सम्झौता

रुपन्देही । दाङबाट सामाजिक सुरक्षा कोषमा आवद्ध भएका सबैको उपचार राप्ती स्वास्थ्य विज्ञान प्रतिष्ठानमा हुने भएको छ । प्रतिष्ठानका रजिष्ट्रार प्रा. श्याम लम्सालले सामाजिक सुरक्षा कोषमा आवद्धहरुको उपचार अब प्रतिष्ठानमा हुने गरी सम्झौता गरिएको बताए ।

सम्झौताअनुसार सामाजिक सुरक्षा कोषमा आवद्ध व्यक्तिहरुको सामान्य उपचारदेखि अप्रेसनसम्मको सेवा प्रतिष्ठानबाट उपलब्ध हुनेछ । सोमबार काठमाडौंमा प्रतिष्ठानका रजिष्ट्रार लम्साल र सामाजिक सुरक्षा कोषका पदाधिकारीबीच सामाजिक सुरक्षा कोषमा आवद्ध व्यक्तिहरुको उपचार प्रतिष्ठानबाट प्राप्त गर्ने गरी सम्झौता गरिएको हो ।

दाङबाट मात्रै सामाजिक सुरक्षा कोषमा ५ हजारभन्दा बढी व्यक्ति आवद्ध छन् । कोषमा आवद्ध व्यक्तिहरुको उपचार गर्ने गरी सम्झौता भएको देशैभरको पहिलो प्रतिष्ठान राप्ती स्वास्थ्य विज्ञान प्रतिष्ठान भएको छ । कोषमा वैदेशिक रोजगारमा गएका व्यक्तिहरु, विभिन्न बैंक तथा कम्पनी, सुरक्षा गार्ड कम्पनीमा आवद्ध सुरक्षा गार्ड तथा कर्मचारीहरु आवद्ध रहँदै आएका छन् ।

यसअघि घोराहीको मितेरी हस्पिटलबाट उपचार हुँदै आएकोमा अब विशेषज्ञ सेवासहित प्रतिष्ठानबाट कोषमा आवद्ध भएका व्यक्तिहरुको उपचार हुने कोषले जनाएको छ । कोषमा आवद्ध व्यक्तिले २४ घण्टाभित्र अनलाइन रेकर्ड बुझाएमा उपचार गर्दा लागेको रकम भुक्तानी हुने जनाइएको छ ।

झण्डै ४ अर्ब बजेटको ४०० बेडको ईआईए पारित

प्रतिष्ठानमा करिब ४ अर्बको ४०० बेडको टिचिङ अस्पताल निर्माण गर्न आवश्यक ईआईए वन तथा वातावरण मन्त्रालयबाट सोमबार स्वीकृत भएको छ । नेपाल उद्योग परिषद्का केन्द्रीय अध्यक्ष बलिभद्र रानाले अब केही दिनमा अर्थ मन्त्रालयबाट स्रोत सुनिश्चित हुने बताए ।

प्रतिष्ठानले ईआईए प्रतिवेदनसहित प्रस्ताव अर्थ मन्त्रालयमा पेश गरिसकेकाले अबको केही दिनमा बजेट सुनिश्चित भएपछि टेन्डर निकाल्ने काम सुरु हुने उनले बताए ।

उनका अनुसार प्रक्रिया अघि बढेपछि भवन निर्माण सुरु हुनेछ ।