मधेशमा काम गर्न नदिएको सीके राउतको गुनासोमा लोसपा प्रदेश सांसद महतोको आपत्ति

जनकपुरधाम । लोकतान्त्रिक समाजवादी पार्टी (लोसपा) मधेश प्रदेशका सांसद उपेन्द्र महतोले जनमत पार्टीका अध्यक्ष डा. सीके राउतले सामाजिक सञ्जालमा गरेको टीकाटिप्पणीमा आपत्ति जनाएका छन् ।

मधेश प्रदेशसभाको चौथो अधिवेशनको मंगलबार भएको पहिलो बैठकमा सांसद महतोले सीके राउतको अभिव्यक्ति हाँस्यास्पद रहेको बताए ।

मधेशमा जनमत पार्टीको मुख्यमन्त्री रहेको छ । सो पार्टीका अध्यक्ष राउतले सत्तारुढ कांग्रेस र एमालेले मुख्यमन्त्रीलाई काम गर्न नदिएको गुनासो सामाजिक सञ्जालमा गरेका थिए । सो विषयमा मुख्यमन्त्री सतिशकुमार सिंहलाई सांसद महतोले भने, ‘तपाईं आफ्नो अध्यक्षलाई भन्नुस्, प्रदेश हामीलाई चलाउनु दिनुस् ।’

आर्थिक वर्षको आधा समय बितिसक्दा पनि विकास निर्माण सुरु नभएको भन्दै सांसद महतोले विगतको जस्तै अवस्था रह्यो भने फेरि पनि विकास रकम थोरै खर्च हुने बताए ।

उनले भने, ‘टेन्डर प्रक्रियामा गएमा २०-२५ प्रतिशत पनि खर्च हुँदैन । केन्द्रले भने खरिद ऐनअनुसार गर्ने, हामीले टेन्डर गर्ने ? यो ठीक हुँदैन । सबै माननीयज्यूले भनेअनुसार सरकारले गर्नुपर्छ ।’

जनमतका अध्यक्ष राउतले चीनको युनान प्रान्तसँग भगिनी सम्बन्ध बनाएको विषय पनि सामाजिक सञ्जालमा लेखेकोमा उनले आपत्ति जनाए । उनले चीनको युनान प्रान्तसँग भगिनी सम्बन्ध बनाउन नमिल्ने र त्यो काम राउतको नभएको पनि बताए ।