मदन भण्डारी गोल्डकप इन्डो-नेपाल भलिबल : नेपाल पुलिस पुग्यो फाइनलमा, शीतलहरले अर्को खेल स्थगित

रुपन्देही । विभागीय टीम नेपाल पुलिस क्लब भारतको गुजरात प्रदेश भलिबल एसोसियसनसँग संघर्षपूर्ण जित निकाल्दै बुटवलमा जारी मदन भण्डारी गोल्डकप इन्डो–नेपाल रनिङ शिल्ड पुरुष भलिबल च्याम्पियनसिप–२०८१ को फाइनलमा यात्रा तय गरेको छ ।

पुलिसले गुजरातलाई ३–१ को सेटमा हराएको हो । मंगलवार भएको पहिलो सेमिफाइनलमा भारतको गुजरात प्रदेश भलिबल एसोसियसनलाई संघर्षपूर्ण खेलमा हराउँदै फाइनलमा पुगेको हो । पुलिसले पहिलो सेटमा २५–२७ ले गुमाएपनि दोस्रो सेट २५–१४ ले आफ्नो पक्षमा पार्यो ।

त्यसपछिको २ सेट पनि पुलिसले २५–२१ र चौथो सेट २७(२५ मा जित्दै अन्तिममा पुगेको हो । पुलिसले आजै हुने त्रिभुवन आर्मी क्लब र मणिमुकुन्द भलिबल क्लबकाबीचको विजेतासंग अर्को फाइनल खेल्ने तालिका भएपनि चिसो र शितलहरका कारण आर्मी र मणिमुकुन्दवीच दोस्रो सेमिफाइनल खेल हुन सकेन ।

प्रतियोगिताको विजेताले ७ लाख ५० हजार, दोस्रो ३ लाख ५० हजार, तेस्रोले १ लाख ७५ हजार र चौथो टोलीले १ लाख रुपैयाँ पाउनेछ ।