कुश्मामा विश्वकै लामो र अग्लो ‘मेगाट्रोल’ सञ्चालनमा आउने

काठमाडौं । साहसिक पर्यटनका लागि प्रमुख गन्तव्य बन्दै गएको कुश्मास्थित ‘द क्लिफ’मा विश्वकै लामो र अग्लो मेगाट्रोल सञ्चालनमा आउने भएको छ । दुई सय ५५ मिटर अग्लो मेगाट्रोलको लम्बाइ १२ सय २८ मिटर छ । यसमा एकैपटकमा तीन जनासम्म खेल्न सकिन्छ ।

द क्लिफका अध्यक्ष राजु कार्कीका अनुसार एक्लै वा जोडीसँगै पनि खेल्न सकिन्छ । मेगाट्रोलको गति प्रतिघण्टा १ सय ४० किलोमिटरको हुनेछ । द क्लिफले विश्वकै दोस्रो अग्लो बञ्जी जम्प, स्वीङ, स्काइ साइकलिङलगायत साहसिक पर्यटकीय गतिविधिका साथै सुविधासम्पन्न रिसोर्टको सुविधा उपलब्ध गराइरहेकामा अब पर्यटकलाई मेगाट्रोल पनि उपलब्ध गराउन लागेको अध्यक्ष कार्कीले जनाए ।

कालीगण्डकी नदीको मनोरम दृश्य हेर्दै यसको अनुभव लिन सकिने उनले बताए । ‘मेगाट्रोल पनि साहसिक गतिविधिमै पर्छ, यसले जीपलाइन र रोलरकोस्टरको ब्लेन्डेड अनुभव दिन्छ । एक वर्षअघि निर्माण सुरु गरिएको मेगाट्रोल करिब दुई सातामा सञ्चालनमा ल्याउने गरी काम गरिरहेका छौँ’, उनले भने ।