चलचित्र ‘कार्साङ’को प्रिमियर साे हेरेपछि दिपाले भनिन्- जितुले गरेको काम रमाइलो छ

काठमाडौं । पुस २६ गतेबाट रिलिजको तयारीमा रहेको चलचित्र ‘कार्साङ’को बुधबार राजधानीमा प्रिमियर साे गरिएकाे छ ।प्रिमियरमा चलचित्रले उत्साहजनक प्रतिक्रिया पायो भने कार्यक्रममा आएका चलचित्रकर्मीहरु पनि चलचित्र राम्रो बनेको बताए ।

प्रिमियर समारोहमा उपस्थित कलाकार तथा अन्य विभिन्न क्षेत्रका व्यक्तिले ‘कार्साङ’लाई हेर्नैपर्ने मौलिक चलचित्र भएको प्रतिक्रिया दिए। शेर्पा समुदायको मौलिक कथा भन्ने चलचित्रले उनीहरूको संस्कार र संस्कृति देखाउन नचुकेको कलाकारहरूले बताएका थिए। शेर्पा समुदायको संस्कृति अनुभूत गर्न पनि यो चलचित्र एकपटक हेर्नैपर्ने धेरैको भनाई थियो।

चलचित्र हेर्न चलचित्र विकास बोर्डका अध्यक्ष दिनेश डिसी, निर्देशक तथा कलाकार दीपाश्री निरौला, निर्देशक दीपेन्द्र के खनाल, वितरक, निर्माता तथा निर्देशक अशोक शर्मा, बसन्त निरौला, कलाकार केदार घिमिरे ’माग्ने बुढा’, हास्य कलाकार किरण केसी (रातामकै), कवि विप्लव प्रतीक, कलाकार अनुप बराल, मनिष राउत, गायक कमल खत्री, मेलिना मैनाली लगायत कलाकार प्रिमियरमा पुगेका थिए ।

चलचित्र हेरेपछि केदार घिमिरेले ‘कार्साङ’ अत्यन्तै राम्रो सिनेमा बनेको प्रतिक्रिया दिए । त्यस्तै, चलचित्र विकास बोर्डका अध्यक्ष दिनेश डिसी र निर्देशक तथा कलाकार दीपाश्री निरौलाले पनि चलचित्रले शेर्पा समुदायको कथा देखाउने र मौलिकपनले भरिएको हुनाले एकचोटी हेर्नै पर्ने चलचित्र बनेको प्रतिक्रिया दिए।

जितुको कामको तारिफ गर्दै दीपाश्रीले जितुको अभिनय पछिल्ला फिल्मपिच्छे उत्कृष्ट बन्दै गएको बताइन् । उनले भनिन,’हामी एकदमै खुसी छौ। एकपछि अरु फिल्ममा भाइले जीवन्त अभिनय गर्नुभएको छ। क्यारेक्टर चेन्ज गर्नुभएको छ । अलिकती नृत्यमा सुधार गर्नुपर्छ नत्र सबै पात्र निभाउन सक्ने मान्छे हो उहाँ ।’

यस्तै किसिमको अभिनय गर्दै जान जितुलाई उनले शुभकामना समेत दिइन् । ‘छक्कापञ्जा’ सिरिजदेखि जितु जीवन्त कलाकारको रुपमा अघि आएको दीपाको भनाइ थियो ।

त्यस्तै, कार्यक्रममा उपस्थित सबैले चलचित्र र कलकारको अभिनयको खुलेर तारिफ गरे। विषयवस्तु र अभिनय दुवैले तारिफ पाएकाले चलचित्रको निर्माणपक्षले पनि दर्शकले चलचित्र मन पराउनेमा ढुक्क भएको जानकारी दिए।

बुधबार सिटी सेन्टर काठमाडौंमा आयोजना गरिएको प्रिमियरलाई शेर्पा समुदायको बस्तीमा पुगेको झल्को दिने तरिकाले तयार पारिएको थियो। कार्यक्रमलाई शेर्पा समुदायको नृत्यसँगै गुम्बा झैँ धजापताकाले सजाइएको थियो ।

पुस २६ गते रिलिज हुने चलचित्र ‘कार्साङ’ यम शेर्पाले निर्देशकिय चलचित्र हो । ग्रामीण परिवेशमा आधारित पारिवारिक कथावस्तुमा केन्द्रित यो चलचित्रले अभाव, गरिबी र शेर्पा समुदायको सांस्कृतिक कथावस्तुलाई प्रस्तुत गर्छ ।

चलचित्रमा दयाहाङ राई, सिर्जना निङलेखुसँगै जितु नेपाल, दीया मास्के, बुद्धि तामाङ, सृष्टि गौतम, डोमा ह्योल्मो, प्रेम लोप्चन र सुरवीर पण्डितलगायत कलाकारको अभिनय रहेको छ ।

यार्सा फिल्म्स र पुरुषोत्तम प्रधान फिल्मसको प्रस्तुतिमा बनेको यो चलचित्रका निर्माता तथा छायांकार पुरुषोत्तम प्रधान हुन् भने सह–निर्मातामा गोविन्द बोहरा छन् । कार्यकारी निर्माताको रूपमा भने आङछिरिङ शेर्पाले काम गरेका छन् ।