मकवानपुरको बज्रबाराहीमा ‘थाहा फिल्म फेस्टिभल’ हुने

हेटौंडा । थाहा फिल्म फेस्टिभलको दोस्रो संस्करण यही पुस २८ गते मकवानपुरको थाहा नगरको बज्रबाराहीमा हुने भएको छ । माघ १ गतेसम्म चल्ने फेस्टिभलमा सर्ट फिल्म, फिचर फिल्म र डकुमेन्ट्रीसहित २० वटा फिल्म प्रदर्शन गरिनेछ ।

महोत्सवमा सहभागिताका लागि पेस भएका ४६ फिल्ममध्येबाट २० वटा छानिएको आयोजक थाहा कला केन्द्रका सानुबाबु मोक्तानले जानकारी दिए ।

फेस्टिभलमा पखेटा, टुल्की, बाटो, लाखे, सतीदेवी, मोदीवेनीलगायतका फिचर फिल्म प्रदर्शन हुनेछन् । सर्ट फिल्मतर्फ बेली, अन्तर्वार्ता, द रोप अफ होप, निर्देश, दुई सय रुपैयाँ, खिललगायतका चलचित्र र डकुमेन्ट्रीतर्फ हिउँ चितुवा, गर्ल्स रिराइटिङ डेस्टिनी प्रदर्शन हुने उनले बताए ।

थाहा नगरलाई नेपाली सिने क्षेत्रको हब बनाउने उद्देश्यसहित गत वर्ष ‘थाहा फिल्म फेस्टिभल’ सुरु गरिएको थियो । फेस्टिभलको माध्यमबाट थाहालाई चलचित्र छायांकनको हबको रुपमा विकास गरिनुका साथै थाहालाई फिल्म सिटीको रुपमा विकास गरिने अवधारणासहित कार्यक्रमको आयोजनालाई निरन्तरता दिइएको मोक्तानको भनाइ छ ।

तीन दिनसम्म चल्ने फेस्टिभलमा देशका चर्चित चलचित्रकर्मी, फिल्म समीक्षकको सहभागिता हुने आयोजकले जनाएको छ ।
काठमाडौं र हेटौंडा जस्ता शहरको नजिकै रहेर पनि थाहा नगरपालिकामा हालसम्म कुनै सिनेमा हल सञ्चालनमा छैन । त्यसकारण सहजै सिनेमा हेर्न नपाउने यहाँका दर्शकलाई लक्षित गरी महोत्सव आयोजना गरिएको फेस्टिभलका संयोजक प्रमोदकृष्ण जोशीले बताए ।

फेस्टिभलको माध्यमले थाहा नगरमा पर्यटन प्रवर्द्धनमा समेत टेवा पुग्ने उनको भनाइ छ ।