जय ट्रफि : सन्दीपले अम्पायरिङप्रति किन पोखे सार्वजनिक असन्तुष्टि ?

काठमाडौं । क्रिकेटर सन्दीप लामिछानेले नेपालमा क्रिकेट अम्पायरिङको स्तरमाथि सार्वजनिकरुपमा नै प्रश्न उठाएका छन् । कमजोर अम्पायरिङले खेलाडीहरुको भविष्यमाथि असर गर्ने उनको चिन्ता छ ।

आज सामाजिक सञ्जालमा सन्दीपले लेखेको स्टाटसको भावानुवादः

मैले यो भन्नु हुन्थेन तर नेपालमा अम्पायरिङको स्तरमा उल्लेखनीय सुधार आवश्यक छ । लामो समयदेखि यो फितलो छ र यदि आवश्यक कदम चालिएन भने भविष्यमा गलत निर्णयहरुका कारण असंख्य खेलाडीहरु पिडित बन्ने छन् । हामीले रेफ्रीलाई क्याप्टेनको रिपोर्ट दिएका हुन्छौं, तर पनि कुनै परिवर्तन आइरहेको छैन । खेलाडीहरुको विकास र खेलको स्वस्थ प्रवद्र्धनमा अम्पायरिङको स्तरवृत्ति महत्वपूर्ण हुन्छ । आशा छ, सरोकारावाला निकायले यसलाई ध्यान दिनेछन् र आवश्यक सुधारहरुका निम्ति काम गर्नेछन् ।

सन्दीप नेपाली राष्ट्रिय टीमका एक अनुभवि सदस्य र पूर्वकप्तानसमेत हुन् । हाल जारी जय ट्रफीमा उनले बाग्मती प्रदेशको नेतृत्वसमत गरिरहेका छन् ।

यत्तिको जिम्मेवार खेलाडीले सार्वजनिक प्लेटफर्ममा नै यसरी असन्तुष्टि पोख्नु स्वभाविक होइन । उनको स्टाटसलाई लिएर अहिले क्रिकेट समर्थकहरु समर्थन र आलोचनामा विभाजित बनेका छन् । सन्दीपले आफ्नो स्टाटसमा कुनै पनि सन्दर्भ उल्लेख गरेका छैनन् ।

कुनै अम्पायरको नाम लिएका पनि छैनन् । तर, उनको यो स्टाटस जय ट्रफी एलिट कपको सन्दर्भमा आएको हो । हिजो त्रिभुवन आर्मी र बाग्मती प्रदेशको खेल बराबरीमा सकिएपछि उनले अम्पायरसँग विवाद गरेका थिए । अम्पायरले खेल समाप्तिको घोषणा गरेपछि उनले बाहिरबाट मैदानभित्र आएर अम्पायरसँग आक्रोशित भावमा कुराकानी गरेको टेलिभिजन लाइभमा देखिएको थियो ।

सन्दीपको गुनासो थियो– अर्को टिमलाई फाइदा पुग्ने गरी अम्पायरले खेल समाप्तिको निर्णय लिएको । दोस्रो इनिङमा २०३ रनको कठिन लक्ष्य पछ्याइरहेको बाग्मती सकेसम्म कम विकेट गुमाएर खेल ड्र गर्ने रणनीतिमा थियो । २८.४ ओभरमा पाचौं विकेटका रुपमा शुभ कंसाकार आउट भएलगत्तै अम्पायरद्वय विनयकुमार झा र हिरालाल राउतले खेल समाप्तिको घोषणा गरे ।

दुवै टिम खेल जित्ने आशामा थिएनन्, तर विकेटलगत्तै खेल समाप्त हुँदा त्रिभुवन आर्मीलाई प्वाइन्टमा फाइदा मिल्यो । सन्दीपले यो विकेट अगाडि नै खेल समाप्ति होस भन्ने चाहेका थिए, जतिबेला शुभ कंसाकार र उत्तम मगरको जोडी क्रिजमा थियो । तर, भिजिविलिटी कम हुँदा पनि विकेट नजाँदासम्म अम्पायरले खेललाई निरन्तरता दिएको सन्दीपको आरोप छ । विकेट जानासाथ ओभर पनि पुरा नगरी खेल समाप्त गरिएकोमा उनले आपत्ति जनाएका थिए ।

यो प्रतियोगितामा एक–एक प्वाइन्टको निकै महत्व छ । एक विकेट थप जाँदा पनि प्वाइन्टमा असर गर्ने भएकाले सन्दीप आक्रोशित भएका हुन् । सन्दीपले गरेको ‘अन फिल्ड प्रोटेस्ट’ अस्वभाविक थिएन । तर फेसबुकमै अम्पायरविरुद्ध गरेको टिप्पणी भने स्वभाविक नरहेको जानकारहरु बताउँछन् ।

नेपाल क्रिकेट संघ (क्यान) का एक पदाधिकारीले भने, ‘सन्दीपको यो ब्लन्डर हो । एउटा जिम्मेवार खेलाडीले कुनै पनि अवस्थामा सार्वजनिकरुपमा अम्पायरको आलोचना गर्न मिल्दैन । क्यानका प्रवक्ता छुम्बी लामाले सन्दीपको स्टाटसलाई ध्यानमा लिइएको बताए । कुनै पनि कप्तानले अम्पायरिङमा चित्त नबुझेको खण्डमा म्याचपछि ‘क्याप्टेन रिपोर्ट’ मा उल्लेख गर्न सक्ने, तर सार्वजनिक टिप्पणी गर्नु नहुने उनको भनाइ छ ।

लामाले भने, ‘क्रिकेटमा अन फिल्ड अम्पायरलाई सघाउन म्याच रेफ्री पनि हुन्छन् । उनीहरु एउटा रुल्स एन्ड रेगुलेसनमा चल्नुपर्छ । यदि अन फिल्ड अम्पायरले कुनै गल्ति गरेमा त्यसलाई म्याच रेफ्रीले हेर्छन् । कप्तानहरुले म्याच रेफ्रीलाई रिपोर्ट गर्न सक्छन् । तर, अम्पायरले गरेको निर्णय सबैले स्वीकार्नै पर्छ । अन्यथा अनुशासन उल्लंघनको विषय हुन सक्छ ।’

सन्दीपका समर्थकहरु भने उनको असन्तुष्टिलाई स्वभाविक र जायज मानिरहेका छन् । कुनै अम्पायरलाई सिधा आरोपित नगरिएको र कुनै निर्णयलाई ईंगित गरेर आलोचना नगरिएकाले अनुशासनको प्रश्न नउठ्ने उनीहरुको भनाइ छ ।

यो प्रतियोगितामा प्रत्येक दिन कम्तिमा ९० ओभरको खेल हुन्छ । मौसम वा भिजिविलिटी खराब भएमा अम्पायरले म्याच रेफ्रीसँग सल्लाह गरेर ९० ओभर भन्दा अगावै खेल समाप्तिको घोषणा गर्न सक्छन् । टेस्ट क्रिकेटमा खेल समाप्तिको घोषणा गर्न ओभर सकिएकै हुनुपर्छ भन्ने छैन । यद्यपि, चाँडै खेल समाप्त गर्दा सकेसम्म दुवै टिम सन्तुष्ट भने हुनुपर्छ ।

एलिट कपमा चारवटा टिम सहभागी छन्, र सबै टिमले एक–अर्कासँग एक–एक दुईदिवसीय म्याच खेल्नेछन् । कुल ६ वटा म्याच खेलाइसकेपछि सबैभन्दा बढी प्वाइन्ट बटुलेर अंक तालिकाको शीर्षस्थानमा रहने दुई टिमबीच फाइनल भिडन्त हुन्छ ।

अहिलेसम्म दुई चरणमा चारवटै टिमले दुई–दुई म्याच खेलिसकेका छन् । जम्मा चारवटा म्याच हुँदा तीनवटा बराबरीमा सकिएको छ भने एउटामा मात्रै नतिजा निस्किएको छ । हिजो सकिएका दुई खेलमा पुलिसले मधेस प्रदेशलाई पराजित गरेको थियो भने त्रिभुवन आर्मी र बाग्मती प्रदेशको खेल ड्र भएको थियो ।

चार खेल सकिएपश्चात एक जित र एक बराबरीसहित ४० प्वाइन्ट बटुलेको पुलिस अंक तालिकाको शीर्षस्थानमा रहेको छ । दुईवटै म्याच ड्र खेलेका त्रिभुवन आर्मी र बाग्मती प्रदेश क्रमशः दोस्रो र तेस्रो स्थानमा रहेका छन् ।

यी दुई टिमबीच दुई प्वाइन्टको मात्रै फरक छ । आर्मीले ३० प्वाइन्ट ल्याउँदा बाग्मतीले २८ प्वाइन्ट ल्याएको छ । एक हार र एक बराबरी नतिजा निकालेको मधेस प्रदेश २१ अंकसहित चौंथो स्थानमा छ ।

अहिलेसम्म कुनै पनि टिमको फाइनलमा स्थान सुरक्षित भइसकेको छैन । तेस्रो राउन्डका दुई खेलले फाइनलिस्टको टुंगो लगाउने छ । एक–एक प्वाइन्टले पनि फरक पर्ने भएकाले सन्दीप तनावमा आएका हुन् ।