जानकी मन्दिरमा सवा लाख दीप प्रज्वलन

जनकपुरधाम । भारतको अयोध्यामा भएको श्रीराम मन्दिर प्राण प्रतिष्ठाको पहिलो वर्षगाँठको अवसरमा जनकपुरधामस्थित जानकी मन्दिरमा दीपोत्सव गरिएको छ ।

हिन्दुवादी सङ्घसंस्थाले आज जानकी मन्दिर प्राङ्गणमा एक लाख २५ हजार दीप प्रज्वलन गरेको हो । मन्दिरमा दीपोत्सव समारोहमा ठूलो संख्यामा नगरवासी उपस्थित छन् । उनीहरु जय श्रीरामको नारा लगाएका छन् ।

भगवान् श्रीरामको जन्मभूमि अयोध्यामा लामो सङ्घर्षपछि मन्दिर निर्माण भयो भने आजकै दिन गतवर्ष प्राण प्रतिष्ठा सम्पन्न भएको थियो । त्यसकै सम्झनामा जनकपुरधाममा पहिलो वर्षगाँठ मनाइएको छ ।

यस्तै पर्साको वीरगन्जस्थित गहवामाई मन्दिरमा २ हजार एक सय दीप प्रज्वलन गरिएको छ ।