जलस्राेतका इन्जिनियरमाथि पौने ५ करोड भ्रष्टाचार गरेको अभियोग, विशेष अदालतमा मुद्दा दायर

काठमाडौं । अख्तियार दुरुपयोग अनुसन्धान आयोगले पौने ५ करोड भ्रष्टाचार गरेको अभियोगमा एक इन्जिनियरविरुद्ध विशेष अदालतमा मुद्दा दायर गरेको छ ।

जलस्रोत तथा सिंचाइ विभाग वा अन्तर्गतका विभिन्न कार्यालयमा कार्यरत तत्कालीन इन्जिनियिर विष्णुकुमार श्रेष्ठले लामो समय सिंचाइ तथा जल उत्पन्न प्रकोप नियन्त्रणका नाममा निर्माण हुने संरचनाबाट ठेकेदारसँग मिलेमतो गरी ४ करोड ८८ लाख ३० हजार ३२९ गैरकानूनी रुपमा आर्जन गरेको आयोगले पुष्टि गरेपछि अदालतमा मुद्दा दायर गरेको हो ।

श्रेष्ठले काठमाडौं, ललितपुरलगायत विभिन्न स्थानमा घर-घडेरी, जग्गा, गाडी खरिद तथा विभिन्न कम्पनीको शेयर तथा लगानी गरेको र विभिन्न व्यक्तिको नाममा समेत जग्गाजमिन र चलअचल सम्पत्ति लुकाई स्रोत नखुलेको गैरकानूनी सम्पत्ति आर्जन गरेको आयोगका सहसचिव एवम प्रवक्ता नरहरि घिमिरेले जानकारी दिए ।

उनका अनुसार सार्वजनिक सेवा प्रवेश गरेको मिति २०४६ असार ३० देखि २०७७ असार ३१ सम्म वैधानिक रुपमा ११ करोड २५ लाख ६५ हजार १९९ रुपैयाँ आर्जन गरेको, तर उनको कमाई यसै अवधिमा १६ करोड १३ लाख ९५ हजार ५२८ रहेको पाइएको छ ।

उनले सार्वजनिक सेवामा रहँदा कमाएको जम्मा र वैधानिक रुपमा कमाएको रकमको हिसाबकिताब गर्दा ४ करोड ८८ लाख ३० हजार ३२९ रहेको छ । श्रेष्ठले सार्वजनिक पदमा रहँदा अख्तियारको दुरुपयोग गरी गैरकानूनी रुपमा आर्जन गरेको सम्पत्ति र त्यसबाट बढे बढाएको सम्पत्तिसमेत पत्नी लक्ष्मीकुमारी श्रेष्ठ, बाबु हरिकुमार श्रेष्ठ, आमा इन्दकुमारी श्रेष्ठ र छोरा विवेक श्रेष्ठसमेतको नाममा राखेको देखिएको भन्दै आयोगले आर्जन गरेको सम्पत्ति जफत गर्न परिवारका ती सदस्यलाई समेत प्रतिवादी बनाएर अदालतमा मुद्दा दायर गरेको छ ।