भूकम्प सुरक्षा दिवस मूल समारोह कीर्तिपुरमा आयोजना गरिने (भिडिओ)

काठमाडौं । २७औं राष्ट्रिय भूकम्प सुरक्षा दिवस मूल समारोह विविध कार्यक्रमका साथ कीर्तिपुर नगरपालिकामा आयोजना गरिने भएको छ ।

१९९० माघ २ को महाभूकम्पको स्मृतिमा जोखिम न्यूनीकरण तथा पूर्व तयारीका विषयमा अनुभव आदान प्रदान गर्दै हरेक वर्ष माघ २ मा यो दिवस मनाइन्छ । यो पटक दिवसको मूल समारोह कार्यक्रम बीपी कोइराला मेमोरियल विज्ञान संग्रहालय परिसरमा आयोजना गरिने शहरी विकास तथा भवन निर्माण विभागमा आयोजित पत्रकार सम्मेलनमा जानकारी दिइएको हो ।

प्रधानमन्त्री केपी शर्मा ओलीको प्रमुख आतिथ्यतामा दिउँसो १ बजे कार्यक्रम हुने विभागका महानिर्देशक ई. मचाकाजी महर्जनले जानकारी दिए । साथै, प्रधानमन्त्रीबाट भूकम्प सुरक्षा प्रदर्शनीको उद्घाटन तथा अवलोकन हुनेछ । उनका अनुसार बिहान ७ बजेबाट प्रभात फेरी सुरू हुनेछ ।

यस वर्ष दिवसको नारा ´भूकम्पले सिकाएको पाठः बलियो संरचना र सुदृढ पूर्वतयारीका साथ´ भन्ने रहेको छ ।

मुल समारोहको कार्यक्रमबाहेक विभिन्न निकायको सक्रियतामा प्रदेश, स्थानीय तहलगायतले विभिन्न सचेतनामूलक कार्यक्रम गरेर यो दिवस मनाउँदै छन् ।