मोर्चाबन्दीको प्रयासमा मधेश केन्द्रित दल, भोलि कार्यदलको पहिलो बैठक

काठमाडौं । मधेश केन्द्रित राजनीतिक दलहरूको मोर्चा गठन गर्ने प्रयासस्वरूप गठित कार्यदलको पहिलो बैठक भोलि बस्ने भएको छ ।

भोलि बिहान ११ बजे धुम्बाराहीस्थित समर्पण एकेडेमीमा बस्ने तय भएको राष्ट्रिय मुक्ति पार्टी नेपालका नेता केशव झाले बताए ।

बैठकमा मोर्चा निर्माणको खाका, उद्देश्य र साझा एजेन्डाबारे छलफल गर्ने तय भएको छ । सरकारले संविधान संशोधनको एजेण्डा अघि सारेपछि मधेश केन्द्रित दलहरुले मुद्दाहरूमा एकजुट भई राजनीतिक शक्ति निर्माण गर्ने प्रयास गर्दै सबै दलहरुले वार्ताका लागि कार्यदल गठन गरेका छन् ।

भोलिको बैठकमा जसपाबाट रेणु यादव र इस्तियाक राई, जसपा नेपालबाट राजकिशोर यादव, लोसपाबाट जीतेन्द्र सोनल र सुरेन्द्र झा, राष्ट्रिय मुक्ति पार्टीबाट केशव झा, जनमत पार्टीबाट अब्दुल खान र शरद यादव, जनप्रगतिशील पार्टीबाट शिवजी यादव र तमलोपाबाट वृषेशचन्द लाल सहभागी हुनेछन् ।