पृथ्वीनारायणलाई सम्झिँदै हङकङमा मनाइयो एकता दिवस, राप्रपा उपाध्यक्ष पाण्डेसहित सहभागी

काठमाडौं । पृथ्वीनारायण शाहको ३०३ औं जयन्तीको अवसरमा हङकङ पुगेर नेपालीहरुले राष्ट्रिय एकता दिवस मनाएका छन् ।

नेपालमा राजसंस्था र हिन्दू राज्यको माग राखेर राजनीति गरिरहेको राप्रपाका उपाध्यक्ष विक्रम पाण्डे, सहमहामन्त्री विजय खड्कासहितले प्रवासी नेपाली एकता समाजले गरेको कार्यक्रममा सम्बोधन गरेका थिए ।

‘पृथ्वीनारायण शाहको बारेमा जसरी चिन्ता लिनु भएको छ । त्यसरी नै राप्रपाले अघि सारेको सैद्धान्तिक विषयलाई पनि साथ दिनुहोस्’, हङकङमा पाण्डेले भने, ‘विदेशीले नागरिकता पाउनुपर्छ भनेर नागरिकता विधेयक बनाइयो तर विदेशिएकाले नेपालमा लगानी गर्छु भन्दा गाह्रो छ ।’

देशलाई माया गर्ने नागरिक नहुँदासम्म रैथाने भाषा र जाति एक नहुँदासम्म सनातनी हिन्दू छातामा नआएको पाण्डको भनाइ थियो । उनले पृथ्वीनारायण शाहले दिएको दिव्योपदेशअनुसार देश र एकता चल्नुपर्ने बताए ।

गोरखाबाट आएका पृथ्वीनारायणले गोरखा बनाउन सक्ने अवस्थामा पनि सबै समेटेर नेपाल बनाएको भन्दै पाण्डेले भने, ‘मूल्यवान संस्कृति जोगाउनका लागि एक बनौं ।’

कार्यक्रममा एकता समाजका अध्यक्ष तुलसी उप्रेतीले कृति चिल्ड्रेन सेन्टरलाई नेपाली डेढ लाख बराबरको नगद सहयोग गरेका थिए । अटिज्मसम्बन्धी बालबालिकाको उपचारका लागि उनले यस्तो सहयोग गरेका हुन् ।

पाण्डे केही दिन अन्य कार्यक्रम गरेर फर्कने तालिका छ ।