जय ट्रफीः खेल हेर्न आएका दर्शकसँग किन भड्किएका थिए सन्दीप ?

काठमाडौं । जय ट्रफी एलिट कपअन्तर्गत हिजोको खेलका क्रममा बाग्मती प्रदेशका कप्तान सन्दीप लामिछाने केही दर्शकसँग क्रुद्ध बने । उनले दर्शकलाई गाली गरेको भिडिओ सामाजिक सञ्जालमा भाइरल बनिरहेको छ ।

जनकपुरधामको रामजानकी बहुउद्देश्यीय रंगशालामा भएको खेलमा बाग्मती र पुलिस टीमको भिडन्तका क्रममा सो घटना भएको हो । सार्वजनिक भएको भिडिओमा दर्शकसँग सन्दीप झोक्किएको मात्र देखिन्छ, तर उनी के कारणले भड्किएका हुन् भन्ने खुल्दैन ।

सन्दीपले मैदान बाहिर बसेका दर्शकतिर लम्किँदै भनेका छन्, ‘दिमाग छैन कि क्या हो तिमीहरुको ? सभ्य मानिस होइनौ तिमीहरु ? रेस्पेक्टको दायरामा बस न यार । हामीले तिमीहरुलाई यस्तो भन्दा कस्तो लाग्छ तिमीहरुलाई ?’

सन्दीपले यसो भनिरहँदा दर्शकले ‘के भयो ? ह्वाट ह्यापन्ड ?’ भनेको मात्र सुनिन्छ ।

त्यसबेला मैदानमा रहेका एक प्रत्यक्षदर्शीका अनुसार करिब एक दर्जनको संख्यामा रहेका दर्शकहरुले खेलाडीहरुलाई होच्याउने गरी होहल्ला गरेका थिए । उनीहरुले अपशब्द पनि प्रयोग गरेको दाबी गरिएको छ । नेपाल पुलिस टीमका खेलाडी अर्जुन साउदले पनि ती दर्शकलाई थर्काएका थिए । यद्यपि उनले थर्काएको भिडिओ सार्वजनिक भएको छैन ।

सन्दीप जय ट्रफी प्रतियोगिता सुरु भएदेखि विभिन्न कारणले निरन्तर चर्चामा छन् । पहिलो खेलमा उनले दुवै इनिङमा पाँच-पाँच विकेट लिएका थिए । त्यसपछिका दुई खेलमा उनको प्रदर्शन औसत रह्यो ।

दोस्रो खेलमा उनी अम्पायरसँग विवाद गरेर चर्चामा आए । उनले अम्पायरको निर्णयप्रति असन्तुष्टि जनाउँदै फेसबुकमा स्टाटससमेत लेखेका थिए ।