ऋषिकेशलाई यसकारण कडाइसाथ दण्डित गर्नुपर्छ

नेकपा (एमाले) का नेता, मोरङ २ का प्रतिनिधिसभा सांसद एवं सार्वजनिक लेखा समितिका सभापति ऋषिकेश पोखरेल यतिखेर धेरैको ‘निशाना’ बनाइएका छन् । सामाजिक सञ्जालदेखि विरोधीहरूको भाषण पोखरेलविरुद्ध उछितो काडिएको भेटिन्छ ।

विभिन्न अनियमितता, अव्यवस्थितरूपमा भइरहेका काम, प्रक्रियाविपरीतका निर्णयमा प्रश्न उठाएकै कारण उनी विरोधीको मसाला बनिरहेका छन् ।

यसकारण तत्काल हटाउनुपर्छ र न्याय निरुपणका सन्दर्भमा प्रचलित अभ्यासलाई सुदृढ तुल्याउँदै कडाइसाथ दण्डित गर्नुपर्छ, गरिनुपर्छ ।

१) विगतमा सुन तस्करी सामान्य झैँ भएको थियो । बसाइँ सराइको क्रममा एक गाउँबाट अर्को गाउँबाट धातुजन्य वस्तुको ओसारपसार भए झैँ सहज भएको थियो । विभिन्न देश-देशान्तरबाट सेटिङमा यहाँ आउने, प्रहरी र राजश्वसँग सम्बद्ध प्रशासनले मौकामा समाइहाले पनि उम्लिएको पानी सेलाउन पनि समय लाग्ला तर यो विषय चाँडचाँडै सेलाउने गरेको थियो । यो तहमा हुने सुन तस्करी, तस्करीको तरिका, यसको मात्रा, प्रकृति आदिको अविलम्ब छानबिन गर्न जरुरी थियो ।

अरु धेरैको मौनतालाई चिर्दै सभापति ऋषिकेश पोखरेलले सिंहगर्जनका साथ सुन तस्करीको छानबिनको विषय उठाउनुभयो । एकपटक होइन, पटकपटक उठाउनुभयो । देश र दुनियाँले नसुञ्जलेसम्म उठाउनुभयो । फलस्वरूप सुन तस्करीको विषय र यसको विवरण परस्पर चियोचर्चो र सार्वजनिक महत्त्वको विषय बन्यो, सार्वजनिक खपतको विषय बन्यो र क्रमशः अध्ययन अनुसन्धानको विषय बन्यो । यसबाट माओवादी नामको राजनीतिक ब्यानर र आडमा उभिएका शीर्षस्थ नेता र नेतृत्वका घरमा सुन भेटिन थाल्यो ।

विगतका सभापतिहरू आँखामा राख्दा नबिझाउने स्वाभावका थिए । अहिले भने स्वाभिमान र इमान बिक्रीमा राखेर चुप लागेर नूनको सोझो गर्न छोडेर किन यत्रो भ्रस्टाचारको जालो उधिनेर यसमा पनि विपक्षीको आँखाको कसिङर बनेको ?

यसबेला सभापति पोखरेलले कम्युनिष्ट नाउँधारी अर्को शक्ति बद्नाम हुन्छ भनेर हेक्का राख्न पर्दैन थियो ? हतारहतार छानबिनको विषयलाई राष्ट्रिय राजनीतिमा सबैको ध्यानाकर्षित विषय किन बनाएको ? यत्रो जनयुद्धको रापतापबाट आएको शक्तिलाई मौकामा अलिअलि गरिखान ठाउँ दिनुपर्ने थिएन ? सुन तस्करी भएकै भए पनि सभापति ऋषिकेश पोखरेलको घरबाट भएको थियो र ? पुलिस प्रशासन लगाएर लगाम लगाउनुको सट्टा अलिअलि बिलो भाग लिएको थियो वा मागेको थियो भने हुँदैन थियो ?

कसैबाट केही लिएन । केही लालच देखाएन । कञ्चीभर आशक्ति देखाएन । राजनीतिमा चाहिने इमान र निष्ठाको पहरेदार भएर उभियो । राजश्व छलि गरेन । कपटपूर्ण व्यवहार गरेन । एमालेजस्तो जिम्मेवार राजनीतिक दलको जिम्मेवार प्रतिनिधिपात्र बनेर निर्धक्क उभियो । यसकारण सभापति ऋषिकेश पोखरेल गलत हो । यसकारण सामान्य कारबाही मात्र होइन, हदैसम्म कडाइसाथ दण्डित हुनुपर्छ ।

२) नेपाल सरकार, अर्थमन्त्रालय मातहतको धितो पत्र बोर्ड र यसको आइपीओ निस्कासनको खेलामा मौका पर्नासाथ लेनदेनको विषयमा डाक बडाबड गरेको भए हुन्थ्यो नि ! तातो न छारो पहुँचमा नरहेका नागरिक सर्वसाधारणको सुरक्षाका खातिर किन बोलेको ? किन लागेको ? यतिबेला इमानको कुरा नगरेर सरक्क भागमा मिल्न पर्दैन थियो ? यसकारण पनि सभापति ऋषिकेश पोखरेललाई कडाइसाथ दण्डित गरिनुपर्छ ।

३) सभापति ऋषिकेश पोखरेल- बीमा क्षेत्रको अर्बौं रकमको चुहावट र विकृति रोक्न र कुइट बीमा नागरिकलाई फिर्ता देऊ सरकार भन्न र निर्णय गराउन किन हतारिएर लागेको ? कायर सभापति यी कतिपय बीमा विचौलिया र बजारिया दलालसँग मिल्नु पदैन थियो ? यसबाट कमिसन लिन बार्गेनिङ गर्ने र बार्गेनिङ नमिलेपछि मात्र यस्ता विषयवस्तुलाई सार्वजनिकीकरण गर्नतर्फ लाग्नुपर्दैन थियो ? यसकारण पनि सभापति ऋषिकेश पोखरेलई कडाइसाथ दण्डित गर्नुपर्छ ।

सुन तस्करी भएकै भए पनि सभापति ऋषिकेश पोखरेलको घरबाट भएको थियो र ? पुलिस प्रशासन लगाएर लगाम लगाउनुको सट्टा अलिअलि बिलो भाग लिएको थियो वा मागेको थियो भने हुँदैन थियो ?

४) हामी नेपालीले पाएका र कमाएका सास्ंकृतिक सम्पदाहरूलाई लिलामसरह आउने दरभाउमा लिजमा दिने कार्यमा माओवादी केन्द्रका अध्यक्ष प्रचण्डको घरबेटीलाइ साथ दिनुपर्दैन थियो ? आफ्नो सुप्रिमो बस्ने घर ठूलो र महत्त्वपूर्ण कि राष्ट्रिय सांस्कृतिक सम्पदा ! यति पनि कुरा नबुझ्ने कस्तो सभापति ? किन हतारहतार जान्ने भएर त्यत्रो ९९ वर्षको लागि लुम्बिनी राम ग्राम लिज दिने कार्यको विरोध गरेको ? चित्त नबुझेको भए आफू सरक्क यसको एउटा भागी बन्दा भइहाल्थो नि !

मौका पाएको बेला कमाइ खानु पाप हो र ? अपराध हो र ? कसैको खाएको वा खाने कुरा गरेको हो र ? यो त राज्यको त हो नि ! आफ्नो सुप्रिमो जोडिएको केसमा लुरुक्क पछि नहटेर किन बढी जान्ने भएको ? किन तम्सिएको ? नेता र नेतृत्व बचाउन तिनको संरक्षण नगरेसम्म राष्ट्रको हित कसरी हुन्छ ? प्रचण्ड राष्ट्रवादलाई संरक्षण गर्नुपर्ने थिएन त ? यसकारण सभापति ऋषिकेश पोखरेलई कडाइसाथ दण्डित गर्नुपर्छ, गरिनुपर्छ ।

५) सार्वजनिक, सरकारी र कम्पनिको नाममा रहेको जमिनको अपचलन, रामदेवको ट्रस्टको दुरुपयोगसहित यस काममा भागीदार बनेर आयआर्जनमा जोडिएको भए ऋषिको के बिग्रिन्थ्यो ? उता बाबा रामदेव, यता सांसद ऋषि ! एउटा संसदको सांसदीय कार्यकालपछि त जिन्दगी मालामाल चल्ने थियो त ! किन यसतर्फ ध्यान नदिएको ? अथवा के-के न गर्छु, सपार्छु भनेर केही राष्ट्रवादी क्रान्तिकारीले गरिखाएको किन देखिनसहेको ? केहीबेर आँखा चिम्म गरेको भए के नै फरक पर्दथ्यो होला ! उल्टै सरकारलाई सम्पूर्ण सम्पत्तिको रेकर्ड किन मागेको ? विगतका सभापति झैँ आफूलाई कायम गर्ने कुरामा किन ध्यान नपुगेको ? यसकारण सभापति ऋषिकेश पोखरेललाई कडाइसाथ दण्डित गर्नुपर्छ ।

६) टेरामक्स घोटला र बाध्यात्मक निर्णयअन्तर्गत भएका ठूला भ्रष्टाचार छानबिन गरौँ भनेर किन भनेको ? आफ्नो कार्यकालभरि चुपचाप बसेको भए हुने थियो नि ! किन छानबिन गर भनेर अख्तियारलाई समेत निर्देशन दिएको ? त्यतिका ठूला नेताहरूलाई बयानमा पठाउनु हुन्छ ? यसले पार्टी र क्रान्तिको साख गिर्दैन ? अरुजस्तो हो र ! बुझ्नुपर्दैन- आफूहरू त जनयुद्धको रापबाट आएको होइन ? यसकारण सभापति ऋषिकेश पोखरेलई कडाइसाथ दण्डित गर्नुपर्छ ।

७) पोखरा र भैरहवा अन्तर्राष्ट्रिय एयरपोर्टसम्बन्धी सम्पूर्ण रूपले छानबीन गर्नुपर्छ । यसमा गम्भीर घोटला छ । घोटलाको गन्धमात्र होइन, दुर्गन्ध आउँछ भनेर किन भन्दै हिँडेको ? भनेको मात्र होइन, अनावश्यक उपसमिति बनाइबनाई किन छानबिन प्रक्रिया अघि बढाएको ? यसो गरेर ठूला कदका नेताहरूलाई दुःख र सास्ती दिन मिल्छ ? हुन्छ ? यसकारण सभापति ऋषिकेश पोखरेललाई कडाइसाथ दण्डित हुनुपर्छ ।

८) निर्माणाधीन हुलाकी सडक पूरा गर्नुपर्दैन, अलिअलि ढिला सुस्ती गरौँ, चुपचाप बसौँ, हिलाम्य र धुलाम्य बनाइ राखौँ ! भोटको राजनीति गरिरहने ठाउँ र थलो बन्छ भन्नुपर्नेमा उल्टै निर्माण प्रक्रियालाई अवरुद्ध पार्ने तत्व, व्यक्ति र शक्तिको पहिचान गर्दै ठेकेदारलाइ हायलकायल काबुमा ल्याएर काममा लगाउनुहुन्छ ? अर्को चुनाव आउदैन अब ? यसरी भोटको राजनीतिको पसल बन्द गर्न हुन्छ ? उसलाई मात्र के बितेको थियो ? सभापति ऋषिकेश पोखरेलई कडाइसाथ दण्डित गर्नुपर्छ ।

सार्वजनिक, सरकारी र कम्पनिको नाममा रहेको जमिनको अपचलन, रामदेवको ट्रस्टको दुरुपयोगसहित यस काममा भागीदार बनेर आयआर्जनमा जोडिएको भए ऋषिको के बिग्रिन्थ्यो ? उता बाबा रामदेव, यता सांसद ऋषि ! एउटा संसदको सांसदीय कार्यकालपछि त जिन्दगी मालामाल चल्ने थियो त ! किन यसतर्फ ध्यान नदिएको ?

९) ग्यास उद्योगहरूले गरेको मनोमानी र गैरकानूनी काम ४००, ५०० लि सिलिन्डर बनाई उद्योगलाई बेच भनेको भए तिम्रो के हुन्थ्यो ? ऋषिको घरबाट भर्नु पर्दथ्यो ? किन आत्तिएर हुँदैन भनेको ? नागरिक सर्वसाधारणमाथि खेलवाड नगर भनेर किन आदेश गरेको ? आदेश गर्ने ऋषि को हो ? बरु सरक्क केही प्रतिशत शेयर मागेको भए उसको के जान्थ्यो ? यसकारण सभापति पोख्ररेल बेइमान हुन् । बडाइँसाथ दण्डित गर्नुपर्छ ।

१०) समाज कल्याण परिषद् र देशमा सक्रिया एनजीओ आईएनजीओका गतिविधिहरूलाई नजिकैबाट नियाल्न, नियन्त्रण र पारदर्शी बनाउन ऋषिलाई के चासो र खसखस लागेको ? तत्काल कानून लेऊ भनेर किन भनेको ? यतिमात्र होइन, राज्यको अत्यन्तै संवेदनशील अंगहरूमा गैरसरकारी लगानीका विषयमा आँखा चिम्लिएको भए ऋषिको के बिग्रिन्थ्यो ? किन हतारहतार रोक भन्ने निर्देशन दिनुपरेको ? यसकारण गलत र अयोग्य ठहरिएका सभापति ऋषिकेश पोखरेलई कडाइसाथ दण्डित गर्नुपर्छ ।

११) कस-कसको कहाँ केमा संलग्नता जस्तो सामान्य माहौल नै नबुझिकन एनसेलको १६ अर्ब राजश्व बक्यौता अनिवार्य उठाउ भन्नु किन परेको ? बहुराष्ट्रिय कम्पनीहरूले कानूनी कमजोरीलाई समाई राज्यलाई स्वामित्व हस्तान्तरण गर्नै नपर्ने ठाउँमा यो गलत छ भनेर किन हस्तक्षेप गर्नुपरेको ? भाग्न लागेका कम्पनीलाई रोकेर राज्यलाई बुझाउनुपर्ने बक्यौता उठाएर किन त्यत्रा ठूला कम्पनीलाइ चिड्याएको ? नेता नेतृत्वको भागमा आउने अंकलाई किन कटौती गराएको ? बरु सरक्क आफू पनि मिलेको भए हुन्थ्यो ! कुराको चुरो पक्ष नबुझ्ने सभापति ऋषिकेश पोखरेल अयोग्य व्यक्ति हुन् । कडाइसाथ दण्डित गर्नुपर्छ ।

१२) इन्टरनेट प्रदायक संस्थाहरूको ८ अर्ब किन उठाएको ? नउठ्दा वा नउठाउँदा ऋषिको के जान्थ्यो ? बक्यौता रकम छुट दिएर सम्झौता किन नगरेको ? यसकारण गलत सभापति ऋषिकेश पोखरेलई कडाइसाथ कारबाही मात्र होइन, हदैसम्मको दण्डित गर्नुपर्छ ।

पोखरा र भैरहवा अन्तर्राष्ट्रिय एयरपोर्टसम्बन्धी सम्पूर्ण रूपले छानबीन गर्नुपर्छ । यसमा गम्भीर घोटला छ । घोटलाको गन्धमात्र होइन, दुर्गन्ध आउँछ भनेर किन भन्दै हिँडेको ? भनेको मात्र होइन, अनावश्यक उपसमिति बनाइबनाई किन छानबिन प्रक्रिया अघि बढाएको ?

१३) नेपाल टेलिकम र स्वास्थ्य मन्त्रालयजस्ता ठूला टेण्डरहरूका विषयमा प्रश्न किन गरेको ? यो आँट कसले दियो ऋषिलाई ? ठूला नेता नेतृत्वसामु प्रश्न गर्ने ऋषि को हो ? मर्यादा ख्याल गर्नुपर्दैन ? यसकारण अयोग्य सभापति ऋषिकेश पोखरेलई कडाइसाथ कारबाही गर्नुपर्छ ।

१४) विद्युत प्राधिकरणमाथि उठेको प्रश्न सभापति पोखरेलले नउठाएको भए पाटन अदालतमार्फत निर्णय गरेर कुलमान दोषि ठहरिने थिएनन् । यत्तिका दिनसम्म शान्त विषयलाई उठाएर र कानुनतः अदालतको ध्यानाकर्षित विषय बनाएर किन बाठो हुन परेको ? त्यत्रो जनसमर्थनसहित हायहाय कमाएको नायक अब बिचरा भएनन् ? बिलखबन्द भएनन् ? बद्नामी भएनन् ? यो सबै कर्म गरेर वा गराएर ऋषिलाई किन ठूलो हुनुपरेको ? आखिरी ६ खर्बको ट्रान्फरमर कुइएर के नै हुन्थो र ? विद्युतका सबै समान, हाइटेन्सनको जमिन दाजुभाइलाई टेण्डरमा एकाधिकार बनाएर त चुपलाग्नु पर्दैन थियो ? कत्ति पनि कुरा नबुझ्ने सभापति ऋषिकेश पोखरेलई कडाइसाथ कारबाही मात्र होइन, दण्डसजाय दिनुपर्छ ।

१५) विगतका सभापतिहरू आँखामा राख्दा नबिझाउने स्वाभावका थिए । अहिले भने स्वाभिमान र इमान बिक्रीमा राखेर चुप लागेर नूनको सोझो गर्न छोडेर किन यत्रो भ्रस्टाचारको जालो उधिनेर यसमा पनि विपक्षीको आँखाको कसिङर बनेको ? यसकारण अनुचित र अयोग्य सभापति ऋषिकेश पोखरेलई कारवाही गर्नुपर्छ, अविलम्ब गरिनुपर्छ ।

निष्कर्ष-

समयको प्रवाह र प्रभावसँग आफूलाई रूपान्तरण गर्न नसक्ने, उभ्याउन नसक्ने, इमान र धर्मको खैजडी बजाएर राष्ट्रको पहेरदार बन्ने सपना देख्ने यस्ता ‘कमजोर’ सभापतिले तुरुन्तै आत्मसमर्पण सँगसँगै आममाफी मागेर सभापतिको जिम्मेवारीबाट छोडिनुपर्छ, टाढिनुपर्छ । नत्र, कानूनलाई यो एउटा विषयमा सुदृढ तुल्याउँदै सभापति ऋषिकेश पोखरेलई कडाइसाथ दण्डित गर्नुपर्छ, गरिनुपर्छ ।

स्रोत : सार्वजनिक लेखा समितिका निर्णयहरू