‘ताण्डवम्’ फागुन ९ बाट चलचित्र हलमा

काठमाडौं । जुनिम गहतराजको निर्देशनमा निर्माण भएको चलचित्र ‘ताण्डवम्’को प्रदर्शन मिति घोषणा गरिएको छ । मंगलबार पोस्टर सार्वजनिक गर्दै यो चलचित्र फागुन ९ गते प्रदर्शनमा आउने जानकारी दिइएको हो ।

सार्वजनिक पोस्टरमा सिनेमाका मुख्य कलाकारहरू क्यारेक्टर लुक्समा प्रस्तुत छन् । पोस्टरमा पुष्कर गुरुङ, प्रेम सुब्बा, सरिना मगर, अंकित खड्का, अनोज पाण्डे र जुनिम गहतराज प्रस्तुत छन् । यो चलचित्रबाट कलरिस्ट जुनिमले निर्देशनमा डेब्यु गर्दैछन् ।

महाशिवरात्रीको छेको पारेर प्रदर्शनमा आउन लागेको चलचित्र नाम जस्तै धार्मिक कनेक्सन पनि रहेको निर्माण टीमले जनाएको छ ।

आफ्नो पहिलो सन्तानको स्वागतको लागि तयारी गरिरहेको नवजोडीको जीवनमा हुने अकल्पनीय घटनाले निम्त्याउने उतारचढावको कथालाई पारिवारिक तथा एक्सन थ्रिलर जनरामा प्रस्तुत गरिएको छ ।

चलचित्रको निर्मातामा धनकुमारी गहतराज, सविना मगर र मनिष गौतम छन् । हरि घले लामाले खिचेको चलचित्रमा सम्राट बस्नेतको एक्सन निर्देशन, सुशान्त गौतमको संगीत र कोविद बज्रको ब्याकग्राउन्ड म्युजिक रहेको छ ।

चलचित्रको कथा, पटकथा तथा संवाद अनिरुद्ध आत्रेय र हुसेनले लेखेका हुन् । निर्देशक जुनिमले ‘पानीफोटो’, ‘पशुपतिप्रसाद २ः भष्मेडन’, ‘खुस्मा’, ‘चिसो मान्छे’ र ‘परस्त्री’ लगायतका दर्जन बढी सिनेमामा कलरिस्टको रूपमा काम गरिसकेका छन् ।