इटहरीमा भएको मोटरसाइकल दुर्घटनामा एमाले नेता राईको मृत्यु

विराटनगर । सुनसरीको इटहरी २० तरहरामा भएको सवारी दुर्घटनामा परि भोजपुर हतुवा गढीका विजय राई (मुकेश) को मृत्यु भएको छ ।

उनी एमालेका स्थानीय नेता हुन् । उनी सवार मोटरसाइकल अनियन्त्रित भएर दुर्घटना हुँदा राईको मृत्यु भएको हो ।

उनी नेकपा एमाले भोजपुर हतुवागढी गाउँपालिका वडा नम्बर ५ का अध्यक्ष हुन् ।

इटहरी उपमहानगरपालिका वडा नं २० हिमशिखर बोर्डिङ स्कुल नजिकै भित्री सडक खण्डमा तरहरा बजारतर्फ आउँदै गरेको को ३८ प २००९ नम्बरको मोटरसाइकल बिजुलीको पोलमा ठोक्किएर दुर्घटना भएको इलाका प्रहरी कार्यालय इटहरीका डिएसपी लक्ष्मी भण्डारीले जानकारी दिए ।

दुर्घटनामा परि गम्भीर घाइते भएका राईको उपचारका क्रममा बिपी कोइराला स्वास्थ्य विज्ञान प्रतिष्ठान धरानमा मृत्यु भएको हो ।

दुर्घटनामा परि इटहरी २० बस्ने १९ वर्षीय अनिष बस्नेत घाइते भएका छन् ।