प्रधानमन्त्रीलाई ध्यानाकर्षण गराएको एक महिना नपुग्दै त्रिदेशीय नाका जोड्ने सडकमा एक अर्ब बजेट

कैलाली । सरकारले खुटिया, दिपायल,चैनपुर,उरैभन्ज्याङ सडक योजनाका लागि एक अर्बको स्रोत सुनिश्चितता गरेको छ ।

धनगढी हसनपुरबाट सुरु भएर स्याउले खुटिया हुँदै दिपायल चैनपुर र चिनियाँ सिमाना उरैभन्ज्याङसम्म जोड्ने सडकको चर्चा धेरै भएपनि बजेट अभावमा कामले तीव्रता पाउन सकेको थिएन । तर, अर्थ मन्त्रालयको बजेट तथा कार्यक्रम महाशाखाले उक्त योजनालाई स्रोत सहमति प्रदान गरेको विवरणमा समावेश गरेर १ अर्ब रकमको स्रोत सुनिश्चितता गरेपछि रोकिएको काम अघि बढ्ने अपेक्षा गरिएको छ ।

सुदूरपश्चिमको मात्र नभई मुलुकको आर्थिक संवृद्धिमा टेवा पुग्न सक्ने नेपाल भारत र चीन जोड्ने मार्ग निर्माणमा सरकारले तदारुकता देखाएको भन्दै नेकपा एमाले जिल्ला कमिटी बझाङले प्रधानमन्त्री केपी शर्मा ओलीलाई आभार प्रकट गरेको छ ।

पुस १३ गते बालुवाटार पुगेर एमाले बझाङको सिङ्गो टोलीले प्रधानमन्त्री ओलीसँग ११ बुँदे माग राखेको थियो । त्यसको दोस्रो नम्बरमा खुटिया दिपायल चैनपुर ताक्लाकोट सडकलाई बजेट विनियोजन गर्न माग थियो ।

प्रधानमन्त्रीलाई माग राखेको एक महिनामै उक्त सडकको लागि बजेट विनियोजन गरेर काम अघि बढाउने वातावरण सृजना गरिएको एमाले केन्द्रीय सदस्य तथा बझाङ जिल्ला प्रतिनिधि सभा इन्चार्ज ऐन महरले बताए ।

‘हामीले प्रधानमन्त्री ज्यूलाई दिपायल चैनपुर ताक्लाकोट सडकमा बजेट नहुँदा काम अघि बढ्न नसकेको लगायतका समस्याहरू राखेका थियौँ । उहाँले पनि ती समस्या समाधान गर्न गम्भीर रहेको बताउनु भएको थियो । हामीले लिखित माग राखेको एक महिनामै स्रोत सुनिश्चित भएको छ’, नेता महरले भने, ‘प्रधानमन्त्री ज्यू सुदूरपश्चिमको विकास र संवृद्धिको विषयमा निकै सकारात्मक हुनुहुन्छ ।’

चीन र भारतलाई जोड्ने यो सबैभन्दा छोटो सडक हो ।यो सडकखण्ड निर्माण गर्न सके सुदूरपश्चिम प्रदेश त्रिदेशीय व्यापारिक क्षेत्रका रूपमा स्थापित हुने र संवृद्धिको ढोका खुल्ने नेता महरले बताए ।

‘खुटिया–दिपायल–चैनपुर–उरैभञ्ज्याङ–ताक्लाकोट सडक विस्तारको लागि बजेट विनियोजन हुनु विकासको दृष्टिले ठुलो कदम हो। यो परियोजना सफलतापूर्वक कार्यान्वयन भएमा बझाङ लगायत सम्पूर्ण सुदूरपश्चिम क्षेत्रको व्यापार, पर्यटन र आर्थिक उन्नतिमा ठूलो टेवा पुग्नेछ’ नेता महरले भने ।

प्रधानमन्त्री ओलीलाई ११ बुँदे माग पत्र बुझाउन केन्द्रीय सदस्य महरसहित सुदूरपश्चिम प्रदेश सभा सदस्य दमन भण्डारी, प्रदेश कमिटी सदस्य जनक जोशी, शारदा विक, दल बहादुर धामी, नेकपा एमाले जिल्ला कमिटी अध्यक्ष दिलबहादुर भण्डारी, उपाध्यक्ष लालबहादुर विष्ट, सचिव नयन बोहरा,उपसचिव पङ्कज भण्डारी, नेकपा एमाले जिल्ला कमिटी बझाङका निवर्तमान सचिव आनन्दलाल विश्वकर्मा लगायतका नेताहरू बालुवाटार पुगेका थिए ।

एक महिना नबित्दै सरकारले आफ्नो माग पत्रमा समेटिएको एउटा योजना समावेश गरेको र अन्य योजनाहरू सरकारले प्राथमिकतामा राख्ने अपेक्षा रहेको उनीहरुले बताएका छन् ।