मन्त्रीहरूको काममा कांग्रेस सन्तुष्ट, सातामा २ दिन जनताबीच जान निर्देशन (भिडिओ)

काठमाडौं । नेपाली कांग्रेसले पार्टीबाट सरकारमा गएका मन्त्रीहरूलाई हप्ताको दुई दिन खुला भेटघाट गर्न निर्देशन दिएको छ ।

सभापति शेरबहादुर देउवा निवास बूढानीलकण्ठमा बसेको कांग्रेस कार्यसमिति सदस्य र मन्त्रीहरूको संयुक्त बैठकले मन्त्रीहरूलाई पार्टी कार्यकर्ता र जनताको गुनासो सुन्न निर्देशन दिएको प्रमुख सचेतक श्याम घिमिरेले बताए ।

उनले भने, ‘हप्तामा दुई निश्चित दिन मन्त्रीहरूले खुला भेटघाट गर्ने, पार्टीको बीचमा गएर आलोपालो सिस्टमबाट कार्यकर्तासँग भेटघाट गर्ने नागरिकको गुनासो सुन्ने, बाँकी पाँच दिन मन्त्रालयको काममा केन्द्रित हुन निर्देशन दिएको छ ।’

उनले मन्त्रीहरूले काम गर्न गरेको प्रयासप्रति पार्टी सन्तुष्ट रहेको भन्दै यो गठबन्धन सहमतिअनुसार पूरा कार्यकाल चल्ने दाबी गरे ।

सरकारले ल्याएको अध्यादेश कांग्रेसकै सहमतिमा ल्याएको भएकाले कुनै असन्तुष्टि नरहेको पनि बताए । उनले केही नेताहरूले राखेको विचार व्यक्तिगत भएकाले पार्टीको आधिकारिक धारणा नभएको बताए ।