१६ वर्षमा मोदीको तेस्रो पत्रकार सम्मेलन अमेरिकामा : अडानीको प्रश्नमा ‘नीजि मामिला’ भन्दै पन्छिए

काठमाडौं । भारतका प्रधानमन्त्री नरेन्द्र मोदीले पछिल्लो १६ वर्षमा तेस्रो पत्रकार सम्मेलन अमेरिकामा गरेका छन् ।

भारतीय समाचार पोर्टल दि वायरका अनुसार अमेरिकाको औपचारिक भ्रमणमा पुगेका मोदीले डोनाल्ड ट्रम्पसँग गरेको बिहीबार गरेको संयुक्त पत्रकार सम्मेलनमा भारतीय खर्बपति तथा मोदीका मित्र गौतम अडानीबारेमा पनि प्रश्न गरिएको थियो ।

अमेरिकामा मुद्दा चलाइएका मोदी निकट अडानीबारेमा पत्रकार सम्मेलनमा सोधिएको थियो । मोदीले अडानीको बारेमा खासै बोल्न चाहेनन् ।

उनले यसलाई ‘नीजि मामिला’ भनेर पन्छिएको दि वायरले उल्लेख गरेको छ ।

मोदीले अडानीको प्रश्नमा भनेका छन्, ‘भारत वशुधैव कटुम्बकममा आधारित एक लोकतन्त्र हो । हरेक भारतीयहरू यो परिवारका सदस्य हुन् । हामी नीजि मामिलालाई दुई देशको छलफलको विषयमा ल्याउँदैनौँ ।’

बाइडेन सत्ता हुँदा गौतम अडानीलाई घुसको मुद्दा दर्ता भएको थियो । तर, गत फेब्रुअरी १० मा डोनाल्ड ट्रम्पले त्यो मामिलालाई १८० दिनसम्मलाई स्थगन गरेको दि वायरले उल्लेख गरेको छ ।