रास्वपाको प्रस्ताव- उच्चस्तरीय आयोग बनाएर नेताहरूको सम्पत्ति छानबिन गरौं

काठमाडौं । राष्ट्रिय स्वतन्त्र पार्टीका कार्यवाहक सभापति डोलप्रसाद अर्यालले राज्यको उच्चतहमा पुगेका नेता तथा व्यक्तिहरूको सम्पत्ति छानबिनका उच्चस्तरीय आयोग बनाउन आग्रह गरे ।

आइतबार प्रतिनिधिसभा बैठकको विशेष समयमा बोल्दै अर्यालले प्रधानमन्त्रीले आफू पनि भ्रष्टाचार नगर्ने र गर्न नदिने बताउँदै आएको भन्दै राज्यको उच्च निकायमा सवैको सम्पति छानबिनका लागि उच्चस्तरीय शक्तिशाली छानबिन आयोग बनाउन आग्रह गरेका छन् ।

प्रधानमन्त्री केपी ओलीले आफ्नो र सत्तारुढ दलका नेतामाथि लाग्दै आएको आरोपको छानबिनका लागि मार्गप्रशस्त गर्ने हिम्मत देखाउन उनको सुझाव थियो ।

संसदबाट प्रश्न उठेपछि आफ्ना सभापतिमाथि छानबिन गर्न तयार भएको र अहिले कानूनी लडाइँ लडिरहेको भन्दै अर्यालले सरकार र सदन समेत अन्य नेताको छानबिनका लागि तयार हुनुपर्ने बताए ।

सभापतिको नागरिकताको विषयमा पनि सांसदहरूले प्रश्न उठाएको भन्दै पार्टी सभापतिको नागरिकता सांसदको घरमा नभई आवश्यक पर्ने निकायमा उपलब्ध गराइने प्रष्ट्याए । सहकारी प्रकरणमा दुई दलको दम्भले नभई नीति र विधिमार्फत छानबिन हुनुपर्ने उनको भनाइ छ ।