शाइन रेसुङ्गा बैङ्क १७ औं वर्षमा,आर्थिक पत्रकारिता पुरस्कार खनाललाई

रुपन्देही ।  काठमाडौं बाहिर केन्द्रीय कार्यालय रहेको ‘ख’ वर्गको शाइन रेसुङ्गा डेभलपमेन्ट बैङ्क १७ औ वर्षमा प्रवेश गरेको छ । बैङ्कको अधिकृत पुँजी ८ अर्ब, जारी पुँजी ४ अर्ब ८७ करोड र चुक्ता पुँजी पनि ४ अर्ब ८७ करोड रुपैयाँ रहेको छ । २०८१ पुस मसान्तसम्मको वित्तीय विवरणअनुसार बैङ्कको निक्षेप संकलन ६९ अर्ब ७२ करोड रहेको छ । कर्जा लगानीतर्फ ५७ अर्ब ४९ करोड रहेको छ ।

जसमा व्यापार कर्जा १८ दशमलव ९१ प्रतिशत, कृषि कर्जा ५ दशमलव ९१ प्रतिशत, आवास निर्माण कर्जा ३ दशमलव ८२ प्रतिशत, विपन्न वर्ग कर्जा ५ दशमलव ८९ प्रतिशत, जग्गा खरिद कर्जा ४ दशमलव ९५ प्रतिशत, होटेल तथा पर्यटन कर्जा १६ दशमलव ८५ प्रतिशत, उद्योग कर्जा १४ दशमलव २१ प्रतिशत, उपभोग्य कर्जा २० दशमलव ३५ प्रतिशत, हायरपर्चेज कर्जा १ दशमलव ४८ प्रतिशत रहेको छ भने अस्पताल, शिक्षा आदीमा ६।५५ प्रतिशत र अन्य कर्जा १।०८ प्रतिशत रहेको बैङ्कले जनाएको छ ।

बैङ्कले आर्थिक वर्षमा २०८०÷०८१ मा ब्याजदर, पारिश्रमिक करलगायत अन्य शीर्षकमा गरी श्रोतमा कर कट्टीतर्फ ३५ करोड ५७ लाख ८० हजार, आयकर तर्फ ३७ करोड ०६ लाख ६६ हजार गरी कुल ७२ करोड ६४ लाख ४६ हजार रुपैयाँ सरकारी कोषमा जम्मा गरेको छ ।

बैङ्कले आर्थिक बर्ष २०८०÷०८१ मा इन्डियन च्याम्बर अफ कमर्सवाट आयोजित दोस्रो इमर्जिङ एसिया बैङ्किङ अवार्डमा वेस्ट पर्फमेन्स अन प्रोफिटाबिलिटी, वेस्ट पर्फमेन्स अन ग्रोथ र वेस्ट बैङ्क शीर्षकमा रनर उपाधिबाट सम्मानित भएको थियो ।

यस्तै नेपाल चार्टर्ड एकाउन्टेन्ट संस्थाद्वारा नेशनल वेस्ट प्रेसिडेन्टल एनुअल रिपोर्ट अवार्ड २०२३ मा सर्टिफिकेट अफ मेरिट र न्यु बिजनेस एज प्रा.लि. वाट वेस्ट म्यानेज्ड डेभलपमेन्ट बैङ्क अफ दि इअर २०२४ वाट सम्मानित भएको थियो ।

बैङ्कका अध्यक्ष थानेश्वर पौडेलले निक्षेप तथा कर्जा लगानीलाई सन्तुलित रूपमा वृद्धि गर्ने, कर्जाको गुणस्तरमा विशेष ध्यान दिई ग्रामीण क्षेत्रमा कृषि, साना तथा मझौला उद्यम लगायतका क्षेत्रहरूमा लगानी बिस्तार गर्ने, डिजिटल कारोबारलाई थप सुरक्षित र भरपर्दो बनाउँदै उत्कृष्ट विकास बैङ्क बन्ने लक्ष्य सहित अघि बढेको बताए ।

बैङ्कका प्रमुख कार्यकारी अधिकृत प्रकाश पौडेलले काठमाडौं बाहिर केन्द्रीय कार्यालय रहेको लुम्बिनी प्रदेशको एकमात्र राष्ट्रियस्तरको यो विकास बैङ्कलाई धेरैभन्दा धेरै सेवाग्राहीको बैङ्क बनाउने प्रतिबद्धता व्यक्त गरे ।

उनले बैङ्क सुशासन, स्पष्ट भिजन र दिशासहित अघि बढेको बताउँदै वित्तीय अनुशासनको पाटोलाई बैङ्कले मुख्य जोड दिएको बताए । विगतमा सबै सरोकारवाला क्षेत्र आर्थिक अनुशासनमा नरहँदा त्यसको असर बैङ्क ब्याजदरमा परेको स्मरण गर्दै पौडेलले बैङ्किङ क्षेत्रमा अनुशासन जरुरी रहेको उल्लेख गरे । उनले डिजिटल बैङ्किङ तथा युवा उद्यमशीलता कार्यक्रमका कारण युवा पुस्तामाझ बैङ्क लोकप्रिय बनेको उल्लेख गरे ।

बैङ्कले वार्षिकोत्सव अवसरमा यसवर्ष उत्कृष्ट शाखाको रुपमा कतरनिया शाखा बर्दिया, सूर्यपुरा शाखा रुपन्देही, खैरेनी शाखा गुल्मी, बिजुवार शाखा प्युठान र योगीकुटी शाखा रुपन्देहीलाई वेस्ट म्यानेज्ड ब्रान्च अवार्डबाट सम्मान गरेको छ ।

शाइन रेसुङ्गा डेभलपमेन्ट बैङ्क लिमिटेडले नेपाल पत्रकार महासङ्घ रुपन्देहीसँग सहकार्य गरेर स्थापना गरेको शाइन आर्थिक पत्रकारिता पुरस्कारबाट यसवर्ष पत्रकार दामोदर खनाल पुरस्कृत भएका छन् ।

एभीन्युज टेलिभिजनका लुम्बिनी प्रदेश प्रमुख एवं बिजनेस खबर पत्रिकाका सम्पादक खनाललाई ५० हजार १११ रुपियाँ राशीको शाइन आर्थिक पत्रकारिता पुरस्कार प्रदान गरिएको हो । बैङ्कका अध्यक्ष थानेश्वर पौडेल एवं प्रमुख कार्यकारी अधिकृत प्रकाश पौडेलले खनाललाई पुरस्कार प्रदान गरेका हुन् ।

अर्थशास्त्र विषयका प्राध्यापक डा।बाबुराम ज्ञवाली संयोजक रहेको छनोट समितिको सिफारिसको आधारमा महासंघले खनाललाई पुरस्कार प्रदान गर्ने निर्णय यसअघि गरेको थियो । पुरस्कृत भएपछि बोल्दै पत्रकार खनालले यो पुरस्कारले आफूलाई आर्थिक क्षेत्रमा कलम चलाउन थप ऊर्जा मिलेको बताए । यतिबेला आर्थिक क्षेत्र समस्यामा परेको भन्दै उनले यसका लागि सबै क्षेत्रले मिलेर अर्थतन्त्रमा देखिएका समस्या हल गर्नेतर्फ पहल र प्रयन्त गर्नुपर्ने उनले सुझाव दिए ।