शान्ति आउँछ र युक्रेन नेटो सदस्य बन्छ भने राजिनामा दिन तयार छु : जेलेन्स्की

काठमाडौं । चुनावी कार्यकालको म्याद सकिएको भनेर रुसी राष्ट्रपति भ्लादिमिर पुटिनले अवैध र अमेरिकी राष्ट्रपति डोनाल्ड ट्रम्पले चुनाव नगर्ने तानाशाह भनेर आलोचना गरिएका युक्रेनी राष्ट्रपति भोलोदिमिर जेलेन्स्कीले आफ्नो देशमा शान्ति आउँछ र देशलाई नेटो सदस्यता मिल्छ भने राजिनामा दिन तयार भएको बताएका छन् ।

चिनियाँ समाचार एजेन्सी सिन्ह्वाका अनुसार आइतबार जेलेन्स्कीले राजधानी किभको एक पत्रकार सम्मेलनमा यस्तो बताएका हुन् । रुसले युक्रेनमा हमला गरेको ठीक तीन वर्ष पुरा भएको दिन जेलेन्स्कीको यस्तो भनाई सार्वजनिक भएको हो । सन २०२२ फेबु्रअरी २४ मा रुसले युक्रेनमा सैन्य हमला सुरु गरेको थियो ।

नेटो सदस्यता बन्न नहुने हो भने सुरक्षा प्रत्याभूति दिएर आफ्नो देशका आठ लाख सैनिकलाई आर्थिक सहयोग गर्ने हो भने पनि तयार भएको जेलेन्स्कीले बताएको चिनियाँ अखबार ग्लोबल टाइम्सले उल्लेख गरेको छ । गत मे महिनामा जेलेन्स्कीको पाँच वर्षे कार्यकालको सीमा सकिएको थियो ।

युक्रेनमा सैन्य कानुन लागु भएको र देश युद्धमा भएको चुनाव गर्न नसकिने भन्दै युक्रेन तथा युक्रेनी समर्थक यूरोपेली देशहरुले जेलेन्स्कीलाई आधिकारिक नेता मानेका छन् । तर, पुटिन र ट्रम्पले भने मान्यता नदिएको जस्तो तर्क गर्दै आएका छन् ।