राष्ट्रसंघमा युक्रेनविरुद्ध रुसको पक्षमा उभियो अमेरिका, भारत र चीन मतदानमा सहभागी भएनन्

काठमाडौं । अमेरिकी विदेश नीतिमा निर्णायक फड्को मार्दै राष्ट्रपति डोनाल्ड ट्रम्प प्रशासनले संयुक्त राष्ट्रसंघ बैठकमा रुसको साथ र युक्रेनको विपक्षमा मत दिएको छ ।

सोमवार राति संयुक्त राष्ट्रसंघमा भएको युक्रेनी क्षेत्रबाट रुसले सेना हटाउनुपर्ने प्रस्तावमाथिको मतदानमा अमेरिकाले विपक्षमा मतदान दिएको हो । अझ रोचक चाहिँ भारत र चीनले यो मतदानमा भाग लिएनन् ।

बेलायत,जर्मनी र फ्रान्स लगायत ९३ देशले प्रस्तावको पक्षमा मत हाल्दा अमेरिका,रुस,इजरायल हंगेरी लगायत १८ भोट विपक्षमा परेको थियो ।

यो प्रस्ताव युक्रेनसँगको रुसको युद्धको तेस्रो वार्षिकोत्सवमा आएको हो । भारत र चीनसहित ६५ देशले मतदानमा भाग लिएनन् ।

रुस युक्रेन युद्धको तीन वर्षमा अमेरिकाले रुसको पक्षमा मत दिएको यो पहिलो पटक भएको सीएनएनले जनाएको छ ।

यद्यपि राष्ट्रसंघको बहुमतबाट मस्कोले युक्रेनको भूभागमा गरेको कारबाहीको भर्त्सना गरिएको छ ।

युरोपलगायत अमेरिकाका स्थायी सहयोगी मुलुकहरू र अमेरिका यसरी पहिलो पटक विभाजित भएका छन् ।