नेकपा एसका उपमहासचिवलाई प्रश्न- झलनाथको फरक मत कसरी सम्बोधन हुन्छ ?

काठमाडौं । नेकपा (एकीकृत समाजवादी) ले पार्टी निर्माणको संकल्पसहित सडक आन्दोलनको तयारी गर्दैछ । हिजो बसेको सचिवालय बैठकले आन्दोलनको विस्तृत कार्ययोजना बनाउन महासचिव घनश्याम भुसालको संयोजकत्वमा ८ सदस्यीय कार्यदल बनायो ।

कार्यदलमा मेटमणि चौधरी, रामकुमार भट्टराई, शेरबहादुर कुँवर, सावित्रा भुसाल, जीवनराम श्रेष्ठ, विजय पौडेल र रामकुमारी झाँक्री सदस्य छन् । कार्यदलले पार्टीको केन्द्रीय कमिटीद्वारा घोषित आन्दोलनको कार्य योजना बनाउनेछ ।

यस्तै बैठकले केन्द्रीय कमिटीबाट पारित भएका दस्तावेज, संगठनलगायत विषयमा आएका सुझावलाई समेटी अन्तिम रूप दिन वरिष्ठ नेता बेदुराम भुसालको संयोजकत्वमा ७ सदस्यीय समिति पनि गठन गरेको छ ।

नेकपा एसले किन काठमाडौं केन्द्रित आन्दोलन गर्दैछ ? त्यसको उद्देश्यबारे हामीले उपमहासचिव रामकुमार भट्टराईलाई सोध्यौं ।

उनले सरकारको गलत रवैयाको विरुद्धमा आफूहरूले आन्दोलन गर्न लागेको बताए ।

उनले भने, ‘हामीले सरकारको गलत रवैयाको विरुद्धमा आन्दोलन गर्न लागेका हौं । महंगीको विरुद्ध, सुशासनको पक्षमा जनता जगाउनको लागि हामीले यो कार्यक्रम गर्न लागेका हौं ।’

उनले आन्दोलनले पार्टी निर्माणमा सहयोग पुग्ने विश्वास व्यक्त गरे । त्यसो त महासचिव भुसालले पार्टी निर्माणको लागि काठमाडौं केन्द्रित आन्दोलन गर्ने प्रस्ताव राखेका छन् ।

त्यसबारे उनले भने, ‘आन्दोलन गर्नको लागि पार्टीका सबै संयन्त्र परिचालन हुन्छ । त्यसले संगठन निर्माणमा पनि मद्दत पुग्छ भन्ने हाम्रो विश्वास हो । बिस्तारै बन्दै जान्छन् ।’
उनले दस्तावेजलाई अन्तिम रूप दिनको लागि कुनै मतभेद नभएको जिकिर गरे ।

उनले थपे, ‘दस्तावेजलाई अन्तिम रूप दिनको लागि पार्टीभित्र कुनै मतभेद छैन। बैठकमा नेताहरुको सुझाव आएका छन्। त्यसलाई समेट्नुपर्छ त्यसलाई राखेर अन्तिम रुप दिनको लागि कार्यदल बनाएका हौं ।’

तर, सम्मानित नेता झलनाथ खनालको बैठकमै फरक मत भएको थियो नि ! त्यो कसरी सम्बोधन हुन्छ ? भन्ने नेपाल प्रेसको जिज्ञासामा उनले भने, ‘त्यो फरक मत भन्दा पनि सुझाव राख्नुभएको हो । उहाँले राखेको प्रस्तावलाई सम्बोधन गर्ने कुरा भएको छ ।’

उनले अनेरास्ववियूमा देखिएको विवाद समाधान हुने बताए ।

उनले थपे, ‘अहिले अलग-अलग भेला भइरहेका रहेछन्, अब पार्टीले त्यस्ता गतिविधिलाई रोकेर आधिकारिकता दिइसकेपछि सबै समस्या समाधान हुन्छन् ।’

नेता खनालले अनेरास्ववियू र युवा संघको नेतृत्व अध्यक्ष माधव नेपालले अपानीबाटै खोसेपछि रुष्ट थिए । उनले सम्मानित नेता पनि केन्द्रीय कमिटीको बैठकले नै तोक्ने उल्लेख भएर विधान आएपछि फरक मतमा आफ्नो पद सामान्य सदस्य लेखेका थिए । उनले अध्यक्ष नेपालको कार्यशैलीमाथि समेत प्रश्न उठाएका थिए । खनालको असन्तुष्टिलाई ३ दिनभित्र सम्बोधन गर्ने गरी केन्द्रीय कमिटी बैठकमा माधव नेपालको प्रस्ताव पारित गरिएको थियो ।

उनले बैठकबाट पार्टी एकताबद्ध ढंगले अघि बढ्ने सहमति भएको जिकिर गरे ।