रास्वपाबाट मोहन थापा अघोषित निलम्बनमा, ढाकाको आरोपपछि आफैंले दिएका थिए निवेदन

काठमाडौं । अमेरिकामा पक्राउ परेका रास्वपा केन्द्रीय सदस्य मोहन थापा पार्टीमा अघोषित निलम्बनमा रहेको खुलेको छ । पार्टीको वेबसाइटमा राखिएको केन्द्रीय सदस्यहरूको सूचीमा उनको नाम छैन ।

विभिन्न विवादमा मुछिएका थापाले यसअघि आफैँले हाल पार्टीको कुनै पनि पदमा नरहने भन्दै निवेदन दिएका थिए । उनको निवेदनपछि केन्द्रीय सदस्यको सूचीबाट हटाइएको पार्टी स्रोतले बतायो । अमेरिकामा पक्राउ परेको घटना सार्वजनिक भएपछि भने पार्टीले उनीबारे कुनै निर्णय लिएको छैन ।

रास्वपाका कार्यवाहक प्रवक्ता मनिष झाले थापा अमेरिकी अध्यागमनको हिरासतमा रहेको जानकारी आएको बताएका छन् । थापाले यसअघि नै ‘आफूले केही व्यक्तिगत कानूनी प्रक्रिया स्पष्ट र समाधान गर्नुपर्ने भएकाले सो किनारा नलागेसम्मका लागि आफू केन्द्रीय सदस्यको जिम्मेवारीबाट बाहिर रहन निवेदन दिएको’ उनको भनाइ छ ।

यसअघि थापालाई रास्वपाका तत्कालीन सांसद डा. ढाकाकुमार श्रेष्ठले आरोपित गरेका थिए । आफूलाई मन्त्री बनाइदिने भन्दै थापाले पैसा मागेको दावी विभिन्न मिडियामा ढाकाले गरेपछि तीव्र विवाद उत्पन्न भएको थियो । त्यसपछि थापाले ढाकाविरुद्ध जिल्ला अदालत काठमाडौंमा गाली बेइज्यतिको मुद्दा हाले । उक्त मुद्दाको छिनोफानो नहुँञ्जेल आफू पार्टीको कुनै पनि पदमा नरहने उनले सार्वजनिक घोषणा गरेका थिए ।

फेसबुकमा उनले लेखेका थिए, ‘मेराविरुद्ध आरोप लगाउनेले प्रमाणद्वारा पुष्टि गर्न नसक्दा नसक्दै पनि, मेरो पार्टीले मलाई कुनै कारवाही गर्नुपर्ने परिस्थिति नहुँदा नहुँदै पनि, कहीँ कतै कसैको मनमा शंका, भ्रम नरहोस् भनेर मैले कानुनी लडाईंको किनार नलागे सम्मका लागि जिम्मेवारी भन्दा बाहिर रहने निर्णय गरेको हुँ ।’

उनको पूरा स्टाटस यस्तो थियोः

राष्ट्रिय स्वतन्त्र पार्टीबाट निष्कासनको कारवाहीमा परी सांसद पद गुमाउनु भएका पूर्व सांसद डा. ढाकाकुमार श्रेष्ठले टेलिभिजनहरूमा दिएको अन्तर्वार्तामा मेरो नाम लिएर उनलाई मन्त्री बनाउने भन्दै मैले पैसा मागेको भन्दै झुटो, भ्रामक र कपोलकल्पित आरोप लगाएका थिए । मैले त्यही बेलामा भने बमोजिम म कानूनी उपचारमा गएको छु । मेरो पार्टीले यस्तो अन्तर्वार्ता सार्वजनिक हुनेबित्तिकै प्रमाणसहित आउन भनेको थिएँ तर २ महिना बितिसक्दा पनि कुनै प्रमाण पार्टीले प्राप्त गरेको छैन । उनको गैरजिम्मेवार अभिव्यक्तिले मेरो प्रतिष्ठा र चरित्र हत्या हुने किसिमको कामको विरुद्धमा प्रचलित कानूनले तोकेको वाक तथा प्रकाशन स्वतन्त्रताको सीमा र दायरा नागेर दिइएको उक्त अभिव्यक्ति विरुद्धमा मैले सम्मानित काठमाडौं जिल्ला अदालतमा कानूनी उपचार र निजलाई कानूनबमोजिम कारवाहीको समेत माग गरी मुद्दा दायर गरेको छु ।

देश बनाउने महाअभियानमा लागेको, धेरैले आश गरेको राष्ट्रिय स्वतन्त्र पार्टीलाई बदनाम गर्ने नियतले गरिएको यस हर्कतलाई नजरअन्दाज गर्नु भनेको जनतालाई धोका दिनु सरह हो । त्यसैले मैले यो निर्णय लिएको हुँ । व्यक्तिगत जीवनमा मेरा कमी कमजोरी हुन् सक्लान् तर, देश बनाउने हिँडेको एक नयाँ पार्टीलाई बदनाम गरेको मलाई कति पनि सह्यय छैन । पार्टीको अनुशासन समिति, केन्द्रीय समिति तथा संसदीय दलमा उनले दिएको बयान र विवरण रेकर्डमै रहेको होला भन्ने समेत स्मरण गराउन चाहन्छु । म, अदालतबाट यस विषयमा न्याय पाउने र भ्रामक हल्ला गर्ने लाई कारवाही हुनेमा निश्चित छु । त्यसैले अदालतको फैसला नआएसम्म म पार्टीको कुनै पनि पदमा नबस्ने जानकारी गराउन चाहन्छु ।

व्यक्तिगतरूपमा मेरा कयौं कमी कमजोरी होलान तर राजनीतिक रुपमा मैले उच्च नैतिकता राख्न सक्नु पर्छ । मेरा विरुद्ध आरोप लगाउनेले प्रमाण द्वारा पुष्टि गर्न नसक्दा नसक्दै पनि, मेरो पार्टीले मलाई कुनै कारवाही गर्नुपर्ने परिस्थिति नहुँदा नहुँदै पनि, कहिँ कतै कासैको मनमा शंका, भ्रम नरहोस् भनेर मैले कानुनी लडाइँको किनार नलागे सम्मका लागि जिम्मेवारी भन्दा बाहिर रहने निर्णय गरेको हुँ ।

तर, आफ्नो र आफ्नो पार्टीको मान प्रतिष्ठामा म कुनै सम्झौता गर्न नसक्ने भएर नै मैले यस्तो निर्णय लिएको छु । मेरो इज्जत र चरित्रमा पुगेको धक्का परिपुरण त कदापि हुनसक्दैन तथापि न्यायिक सन्देशका निमित्त १ मात्र क्षतिपूर्तिको दाबी गरी फिराद दायर गरेको छु ।