चारदेशीय टी-२०आई सिरिज : नेपालको चौथो हार, फाइनल खेल्ने सम्भावना सकियो

काठमाडौं । चार देशीय महिला टी-२० सिरिजमा नेपालले चौथो हार बेहोरेको छ । भर्खरै सकिएको चौथो खेलमा नेपाल युगाण्डासँग ४० रनले पराजित भयो । घरेलु टोली युगाण्डाले दिएको ९२ रनको लक्ष्य पछ्याएको नेपाल १७ ओभर एक बलमा ५१ रनमा समेटियो ।

नेपालका लागि कविता जोशी १२ र कप्तान इन्दू बर्माले ११ रन बनाउनुबाहेक अन्य ब्याटरले दोहोरो अंकमा रन बनाउन सकेनन् । बलिङमा युगाण्डाका आइरिन मुटोनी र निष्कलंक नाकिसुयीले समान ३-३ विकेट लिए ।

त्यसअघि युगान्डाको एन्टेब्बे क्रिकेट ओभल मैदानमा टस जितेर पहिला ब्याटिङ गरेको घरेलु टोलीले निर्धारित २० ओभरमा ५ विकेट गुमाउँदै ९१ रन बनाएको थियो । युगाण्डाकी रिता मुसमालीले सर्वाधिक ३८ रन बनाइन् । बलिङमा नेपालकी रिया शर्माले २, पूजा महतो, इश्वरी विष्ट र रुविना क्षेत्रीले एकएक विकेट लिएका थिए ।

चौथो हारसँगै नेपालको फाइनल पुग्ने सम्भावना सकिएको छ । पहिलो खेलमा नामिबियासँग ६ विकेटले पराजित भएको नेपालले दोस्रो खेलमा युगाण्डालाई एक विकेटले पराजित गरेको थियो । तेस्रो खेलमा भने नेपाल नामिबियासँग २३ रनले पराजित भएको थियो । नेपालले अब पाँचौं तथा अन्तिम खेल भोलि हङकङसँग खेल्नेछ ।