भारतमा पूर्वराष्ट्रपतिको मासिक तलब साढे दुई लाख, पूर्वप्रधानमन्त्री दम्पतीलाई सुविधैसुविधा

काठमाडौं । नेपालमा अहिले पूर्वविशिष्टहरुलाई दिने सेवा सुविधाको बहस चुलिएको छ । के दिनु सही र के दिनु गलत भन्ने सवाल मास मिडिया र सोसल मिडियामा चर्चा छ । यसै मेसोमा यो सामग्रीमा नेपालको छिमेकी भारतका अवकाशप्राप्त पूर्वराष्ट्रपति तथा पूर्वप्रधानमन्त्रीहरुलाई दिइने सेवा सुविधाको चर्चा गरिएको छ ।

पूर्वराष्ट्रपतिलाई मासिक साढे दुई लाख तलब र निःशुल्क घर

भारतका पछिल्लो समयमा अवकाश पाएका राष्ट्रपति हुन् रामनाथ कोभिन्द । सन २०२२ जुलाई २५ मा अवकाश भएसँगै उनले पाउने सेवा सुविधा के के हुन् भन्नेबारेमा भारतीय मिडियाहरुले धेरै समाचार बनाए ।

भारतीय सञ्चारमाध्यम जागरण जोशका अनुसार भारतका पूर्व राष्ट्रपतिको रुपमा कोभिन्दले पाउने सेवा सुविधाहरुमा मासिक साढे दुई लाख भारतीय रुपैयाँ तलब, आजीवन निःशुल्क उपचार तथा आकर्षक घर रहेका छन् ।

यत्तिमात्रै होइन, भारतभरमा जल, स्थल र हवाई जहाँबाट यात्रा गरे तापनि निःशुल्क गर्न पाउँछन् । उनको साथमा थप एक जना जान पाउने व्यवस्था गरिएको छ । अवकाश प्राप्त राष्ट्रपतिका श्रीमान वा श्रीमती जसले भए तापनि निःशुल्क कार तथा टेलिफोन सेवा पाउनेछन् । भारतभर यात्रा गर्न १२ उच्च तहको हवाई टिकट पाउनेछन् । एक सचिवालय हुने र त्यसको खर्बबर्च पनि सरकारले नै गर्ने व्यवस्था भारतमा छ ।

पूर्वप्रधानमन्त्रीलाई सुविधा: निःशुल्क आवास, सञ्चार, स्वास्थ्य, यातायात सेवा

भारतका पूर्वप्रधानमन्त्रीलाई जीवनभर निःशुल्क आवास सुविधा हुन्छ । भारतीय समाचार पोर्टल इन्डिया डटकमका अनुसार पूर्वप्रधानमन्त्रीलाई हवाई सेवामा वर्षको ६ वटा टिकट दिइन्छ भने रेलमा जत्तिसुकै यात्रा गर्दा पनि शुल्क लाग्दैन ।

यस्तै स्वास्थ्य सेवा निःशुल्क छ । मासिक २० हजार पेन्सन पाइन्छ । पाँच वर्षसम्म विशिष्ट सुरक्षा सुविधा हुन्छ भने मन्त्री तहका सेवासुविधा सबै हुन्छन् । जीवनभर पानी र बिजुलीको पनि पैसा लाग्दैन ।

पूर्वप्रधानमन्त्रीका पति÷पत्नी र आश्रितहरुले पनि निःशुल्क रेल यात्रा, निःशुल्क सरकारी अस्पताल सेवा तथा हवाई भाडामा व्यापक छुट पाउने व्यवस्था गरिएको छ ।