‘अञ्जिला’को बक्स अफिस कलेक्सन- तीन दिनको व्यापार २ करोड ७ लाख

काठमाडौं । फागु पूर्णिमाको अवसर पारेर गत बिहीबार रिलिज भएको चलचित्र ‘अञ्जिला’को तीन दिनको ग्रस कलेक्सन सार्वजनिक गरिएको छ । निर्माण टीमले आइतबार सार्वजनिक गरेको कलेक्सन रिपोर्टअनुसार चलचित्रले बिहीबार, शुक्रबार र शनिबारसम्म २ करोड ७ लाख व्यापार गरेको छ ।

रिलिजको पहिलो दिन चलचित्रले दिउँसोबाट मात्र शोहरु पाएको थियो । पहिलो र दोस्रो दिन चलचित्रले दर्शकबाट सकारात्मक प्रतिक्रिया पाएपछि शनिबार केही शोहरू थप गरिएको निर्माण पक्षले जनाएको छ ।

‘अञ्जिला’ नेपाली महिला राष्ट्रिय फुटबल टीमकी कप्तान अञ्जिला तुम्बापो सुब्बाको जीवनीमा आधारित चलचित्र हो । चलचित्रमा अञ्जिलाले न प्रमुख भूमिका निभाएकी छन् ।

उनको बाल्यकालदेखि खेल जीवनसम्मको सङ्घर्ष र सफलताको कथा प्रस्तुत गरिएको चलचित्रमा अञ्जिलाको साथमा प्रेमकुमार श्रेष्ठ, सुनिल थापा, दयाहाङ राई, विजय बराल, सिर्जना सुब्बा, माओत्से गुरुङ, सुमीन गुरुङ, बुद्धि तामाङलगायतका कलाकारको अभिनय रहेको छ ।